ZPS thotë se Thaçi gënjeu, sipas tyre iu dërgua ftesë për intervistim më 17 nëntor dhe për herë të parë u paraqit në Hagë për intervistë më 12 dhjetor

auto_le-president-du-kosovo-hashim-thaci1594710161
Author

Raporton: Medina KADRIU

Nëntor 20, 2020

Prishtinë – Në kërkesën për fletarrestim të Gjykatës Speciale thuhet se Hashim Thaçi ishte ftuar për tu intervistuar më 17 nëntor 2019 dhe se për herë të parë ishte paraqitur në Hagë për intervistë më 12 dhjetor 2019.

Ndërkaq, në aneksin e dytë të kërkesës për fletarrestimit është paraqitur një shkrim të Gazetës “Zëri”, të datës 1 prill 2020, ku thuhet se ky i fundit në emisionin “Pressing”, në T7, kishte thënë se nuk ka marrë ftesë nga Specialja deri tani. “Nuk jam intervistuar, por është normale në se thirrja dorëzohet”, thuhet tutje se ka thënë Thaçi.

Sipas ZPS-së, Thaçi ka gënjyer publikisht për shkallën e përfshirjes së tij personale me ZPS.

Gjithashtu, në kërkesën për fletarrestim thuhet se në vitin 2019, Thaçi loboi për “reformën” e Dhomave të Specializuara dhe pohoi se i takon Qeverisë së Kosovës për të vendosur për mandatin, funksionimin dhe vendndodhjen gjeografike të Dhomave të Specializuara dhe Zyrës së Prokurorit të Specializuar.

Ndërkaq, në fusnotë të këtij paragrafi të lartpërmendur, ZPS ka cituar se në aneksin e dytë i është bashkangjitur letra që ishte raportuar se ky i fundit ia kishte dërguar Micheal Pompeos më 29 nëntor, që ishte raportuar në Gazetën “Express”.

Ndryshe, më 9 nëntor, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.

Njëjtë është deklaruar edhe Veseli në paraqitjen e tij me 10 nëntor, sikurse edhe Selimi me 11 nëntor.

Ndërsa, me 18 nëntor është mbajtur konferenca mbi ecurinë e çështjes.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Sipas akuzës së ngritur, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.

“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.

Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci.

“Ndër anëtarët e tjerë të ndërmarrjes kriminale të përbashkët ishin Azem SYLA, Lahi BRAHIMAJ, Fatmir LIMAJ, Sylejman SELIMI, Rrustem MUSTAFA, Shukri BUJA, Latif GASHI dhe Sabit GECI, si dhe disa udhëheqës të tjerë politikë dhe ushtarakë të UÇK-së dhe QPK-së, ndër të cilët edhe anëtarë të tjerë të Shtabit të Përgjithshëm; ministra dhe zëvendësministra të QPK-së; komandantë të zonave të UÇK-së, zëvendëskomandantë të zonave dhe anëtarë të tjerë të shtabeve të komandave të zonave; komandantë të brigadave dhe njësiteve; komandantë dhe anëtarë të shërbimeve policore dhe të zbulimit të UÇK-së dhe QPK-së; ushtarë të tjerë të UÇK-së dhe zyrtarë të tjerë të QPK-së; si dhe të tjerë që vepronin në emër të UÇK-së dhe QPK-së (së bashku me Hashim THAÇIN, Kadri VESELIN, Rexhep SELIMIN dhe Jakup KRASNIQIN, bashkërisht, ‘anëtarët e NKP-së’). Të gjithë këta individë, me veprimet dhe mosveprimet e tyre, kontribuan në arritjen e qëllimit të përbashkët. Si alternativë, disa ose të gjithë këta individë nuk ishin anëtarë të ndërmarrjes kriminale të përbashkët, por u përdorën nga anëtarë të ndërmarrjes kriminale të përbashkët për të kryer krime për realizimin e qëllimit të përbashkët (së bashku me anëtarët e NKP-së, bashkërisht ‘anëtarët dhe instrumentet e NKP-së’)”, thotë akti akuzues. /BetimipërDrejtësi