Veliaj: Janë aprovuar 6 milionë euro më pak se që kemi kërkuar, ndikon në efikasitet

Raporton: “Betimi për Drejtësi”

Fahret Velija, anëtar i Këshillit Gjyqësor të Kosovës (KGJK), në emisionin “Tempus” në KTV tha se u janë aprovuar 6 milionë më pak buxhet se që kanë kërkuar, gjë që ndikon në efikasitet.

“Edhe drejtori e ka cekur këtë, besoj që këto të dhëna nuk kanë nevojë të përsëriten, veç një fakt është interesant që për vitin 2022 nga Këshilli Gjyqësor i Kosovës kërkesa ishte për 38 milionë e 623 mijë, ndërsa është aprovuar 32 milionë. Do me thënë 6 milionë ma pak nga ajo që kemi kërkuar ne, që kjo ndikon me automatizëm në efikasitetin e gjyqësorit. Veç një fakt po e përmendi, statistikat po i lidhi me vitin 2019 dhe 2021, për shkak se 2020 nuk du me marrë se ishte vit i pandemisë dhe nuk mund të merret me statistika. Në vitin 2019 në gjykatat e Kosovës janë pranuar 96 mijë e 419 lëndë, ndërsa buxheti për këtë vit i aprovuar ishte 28 milionë e 404 mijë euro, ndërsa në vitin 2021 në gjykata janë paraqitur 139 mijë lëndë, që do të thotë se i kemi 43 mijë lëndë më shumë se në vitin 2019, ndërsa buxheti i vitit 2021 është ma i vogël se buxheti i vitit 2019, do të thotë buxheti për vitin 2019 ishte 28 milionë, ndërsa për vitin 2021, 29 milionë e 194 mijë. Do me thënë kemi lëndë më shumë, kemi efikasitet ma pak për shkak të buxhetit”, tha Velija.

Ai shtoi se kërkesat e KGJK-së për rritje të buxhetit ishin paraparë pikërisht për pozitën në sistemin gjyqësor.

“Ligji për gjykatat ka hyrë në fuqi në 2013-ën, ku është paraparë që secili gjyqtar është paraparë të ketë një bashkëpunëtor, gjë që nuk u realizu. Në 2013-2022 jemi sot”, tha ai.

I njëjti përmendi edhe Gjykatën Komerciale, ku tha se është dashtë të aprovohen 82 pozita dhe janë aprovu 50 dhe kjo ndikon në efikasitet. /BetimipërDrejtësi

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë