Vazhdon mbrojtja e të akuzuarve, në gjykimin kundër ish-krerëve të BSPK-së

Raporton: Valdet HAJDINI

Prishtinë – Ka vazhduar mbrojtja e të akuzuarve, në gjykimin kundër tre ish-zyrtarëve të Bashkimit të Sindikatave të Pavarura të Kosovës (BSPK), Bahri Shabani-Kryetar, Rrahman Emini-Arkatar dhe Sami Rrahmani-Vozitës, të akuzuar për veprën penale ”përvetësimi gjatë ushtrimit të detyrës”.

Në seancën e të premtes, ka vazduar mbrojtjen e vet i akuzuari Rrahman Emini, i cili para trupit gjykues të udhëhequr nga gjyqtari Beqir Kalludra, deklaroi se shumën prej 11.500 euro i kishte tërhequr nga Arka e BSPK-së.

“Për tërheqjen e atyre mjeteve kam pasur urdhëresë të nënshkruar nga Kryetari i BSPK-së Bahri Shabani dhe Nënkryetari për Çështje Financiare Ali Dragusha”, tha i akuzuari Emini.

Në pyetjen e prokurorit Ilaz Beqiri, se për çfarë qëllimi ishin nxerr parat, i akuzuari Emini deklaroi se ka pasur një kontratë mes BSPK-së dhe Ministrisë së Punës dhe Mirëqenies Sociale-MPMS për dhënien e atyre mjeteve si huazim.

“Detyrë e imja si arkatar ka qenë zbatimi i urdhërave të Kryetarit, jo edhe verifikimi se a janë kthyer mjetet apo se si kanë qenë kushtet për kthimin e tyre, sepse verifikimi ishte në përgjegjësi të financierit”, tha i akuzuari Emini.

Në këtë seancë ka filluar mbrojtjen edhe i akuzuari i fundit, Sami Rrahmani, i cili deklaroi se në BSPK-ë ka punuar nga 2002 deri në 2007, kur ishte larguar nga puna.

Në pyetjen e avokatit mbrojtës Ali Beka, në lidhje me dërgimin e parave në MPMS, i akuzuari Rrahmani tha “se i kujtohet që shumën e parave prej 11.500 euro e ka dërguar në MPMS,  ato mjete ia kishte dorëzuar Veli Lecajt, por atë ditë nuk kishte marr asnjë dokument të nënshkruar”.

“Pas dy-tri ditëve më kujtohet të më ketë thirrur Veli Lecaj për të më dhënë kontratën, kur kam shkuar ai vet me dorën e tij e ka nënshkruar kontratën dhe ma ka dhënë”, tha i akuzuari Rrahmani.

Për shkak të përfundimit të orarit të punës u ndërpre seanca, ndërsa mbrojten i akuzuari Rrahmani do ta vazhdoi në seancën e ardhshme

Seanca e radhës u caktua për 10 nëntor 2016, me fillim në ora 13.00.

Prokuroria Themelore në Prishtinë i akuzon tre ish-zyrtarët e BSPK-së, Bahri Shabani-Kryetar, Rrahman Emini-Financier dhe Sami Rrahmani-Shofer, se të njëjtit kanë keqpërdorur pozitën zyrtare. Sipas prokurorisë, të akuzuarit në bazë të marrëveshjes paraprake dhe me qëllim të përvetësimit të dobisë pasurore, kanë tërhequr nga Arka e BSPK-së, në emër të huazimit për Ministrinë e Punës dhe Mirëqenies Sociale shumën e parave prej 11.500,00 euro. Nga ana tjetër, një kontratë e tillë nuk ekziston në MPMS, me çka mjetet e tërhequra janë përvetësuar nga të akuzuarit, por të cilët e kanë mbyllur Arkën e BSPK-së në emër të kthimit të huazimit nga kjo ministri.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë