Vazhdon gjykimi ndaj Pren Krasniqit dhe Azem Bajramit

Raporton: Diana BERISHA

Prishtinë, 9 Shkurt 2016 – Në Gjykatën Themelore të Prishtinës, të martën, ka vazhduar shqyrtimi gjyqësor ndaj Pren Krasniqit dhe Azem Bajramit të akuzuar për marrje ryshfeti, dhënie ryshfeti dhe ushtrim i ndikimit.

Shadije Gërguri kryetare e trupit gjykues ka vazhduar seancën me dëgjimin e dëshmitarit Vion Peja. Gjatë marrjes në pyetje nga prokurori Ilaz Beqiri, dëshmitari Peja ka sqaruar veprimtarinë e tij të punës në kompaninë Kujtesa. Ai tha se në cilësinë e partnerit menaxhues ka bërë shpërndarjen e internetit dhe kabllovikut nëpërmjet kabllove dhe vendosjen e tyre në shtylla.

Peja bëri të ditur se në mungesë të shtyllave gjithmonë ishin përdorur shtyllat e KEDS-it ose PTK-së me të cilët kishte kontratë për shfrytëzimin e këtyre aseteve për të cilat paguanin 0.92 cent për shtyllë. Sipas kontratës kërkohej që të plotësoheshin kushtet për vendojsen e këtyre kabllove, ku ekzistonte Komisioni, i cili bënte vlerësimin e kabllove dhe shtyllave. Sipas dëshmitarit, në këtë Komision kishte qenë edhe i akuzuari Azem Bajrami në cilësinë e përgjegjësit për menaxhimin e aseteve të KEDS-it. Aso kohe, dëshmitari Peja tha se me kërkesë të të akuzuarit Bajrami kishte pranuar në punë vajzën e tij. Dhe për një gjë të tillë, dëshmitari tha se nuk kishte pasur konkurs për pozita të kualifikuara, mirëpo e kishte pranuar atë në një pozitë që ndërlidhej me mbledhjen e reseverëve nga kilentët. E gjitha kjo ka ndodh pas shfrytëzimit të aseteve nga ana e KEDS-it.

Dëshmitari Peja tha se në deklaratat e dhëna në polici, ai asnjëherë nuk kishte theksuar se kishte qenë nën presion për ta punësuar vajzën e të akuzuarit. Dëshmitari tha se ishte ndjerë nën presion vetëm gjatë ndërtimit të shtyllave për t’i vendosur kabllot.

Më tutje, çështjet që u shtruarn me dëshmitarin Peja ndërlidheshin me kontratat e punës në kompaninë Kujtesa. Mbrojtësi i të akuzuarit Azem Bajrami, avokati Behar Ejupi tha se prokurori Ilaz Beqiri po ushtron ndikim apo presion me pytjet e tij për dëshmitarin. Megjithatë, dëshmitari deklaroj se nuk e ndjen vetën nën presion.

I pyetur se a kishte ushtruar dikush presion në punësimin e vajzës së të akuzuarit Azem Bajrami, dëshmitari Peja u përgjigj se nuk e konsideron një gjë të tillë si presion por vetëm si kërkesë nga ana e të akuzuarit.

Tutje janë prezantuar kontratat e vajzës së punësuar të të akuzuarit si dhe me leximin e provave tjera si: Marrëveshja për distribuimin e kabllove televizive, kërkesa për dhënien e pëlqimit të shfrytëzimit të aseteve të KEK-ut, raporti informues lidhur me zbatimin e urdhëresës, raporti informues lidhur me zbatimin e operacionit dhe bastisjes.

Avokati Behar Ejupi ka kërkuar nga trupi gjykues që procedura e provave të plotësohet me kontratën, e cila u lexua gjatë seancës, ndërkaq prokurori Ilaz Beqiri ka propozuar që provave të i’u bashkangjitet edhe data e saktë e punësimit të vajzës së të akuzuarit.

Mbrojtësi i të akuzuarit Pren Krasniqi, avokati Nikë Shala, ka propozuar që në seancën e ardhshme, e cila do të mbahet me 22 mars në orën 10:00, të ftohet dëshmitari kryersor, Leonard Hoxha.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë