TRE MUAJ BURGIM ME KUSHT DHE 200 EURO GJOBË NDAJ TË AKUZUARIT PËR VJEDHJE TË ENERGJISË ELEKTRIKE

Raporton: Verona KADRIU

Ferizaj – Isuf Xhemajli i akuzuar për veprën penale “vjedhje e shërbimeve komunale” pas pranimit të fajësisë u dënua me tre muaj burgim me kusht si dhe gjobë 200 euro.

I pandehuri, sipas aktakuzës së ngritur nga Prokuroria Themelore në Ferizaj akuzohej për veprën penale “vjedhje e shërbimeve komunale” sepse në shtëpinë e tij, në Ferizaj, gjatë kontrollimit nga ana e punëtorëve të KEDS, është konstatuar se në njehsorin elektrik për rreth kapakut nga ana e djathtë ishte futur shiriti filmik, duke penguar punën e diskut. Në këtë mënyrë energjia e shpenzuar nuk ishte regjistruar fare, duke dëmtuar KEDS-in në shumë prej 496,94 euro.

Pasi që prokurori i shtetit Visar Musa lexoi aktakuzën e ngritur kundër të pandehurit, lidhur me fajësinë për veprën penale që akuzohej ai deklaroi se është fajtor dhe pranoi fajësinë. Ndërkaq shtoi se është i papunë dhe nuk ka pasur mundësi të paguaj energjinë elektrike, dhe  që për këtë arsye është detyruar të kryej këtë vepër penale.

Aktgjykimi ndaj tani të dënuarit Isuf Xhemajli u bë nga gjykatësja individuale e çështjes Hysnije Gashi, të mërkurën në Gjykatën Themelore në Ferizaj.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë