Thyhen dhe demolohen zyrat e KBI në Kamenicë, dyshohet se u vodhën mbi 1 mijë euro

Raporton: Blerim JAKUPI

Kamenicë- Bashkësia Islame e Kosovës (BIK), ka bërë të ditur se persona të panjohur kanë vjedhur e demoluar zyrat e Këshillit të BI-së në Kamenicë, ku dyshohet se janë vjedhur 1 mijë e 86 euro.

Kjo u bë e ditur përmes një postimi në Facebook nga BIK, ku thuhet se zyrat ishin gjetur të thyera mëngjesin e së premtes, raporton “Betimi për Drejtësi”.

“Këshilli i Bashkësisë Islame në Kamenicë njofton se sot rreth orës 9.00 janë gjetur të thyera dhe të demoluara zyrat e Këshillit të BI-së. Me këtë rast dyshohet për vjedhje dhe demolim të rëndë i të mirave materiale që gjendeshin në objektin e administratës së KBI-së në Kamenicë”, thuhet në njoftim.

Në këtë njoftim, kryetari i Këshillit të Bashkësisë Islame (KBI) në Kamenicë, Ferid Dërmaku ka bërë të ditur se këto zyra janë hapur dhunshëm.

“Objekti i KBI-së në Kamenicë është hapur dhunshëm nga dritarja në katin përdheses dhe janë thyer, demoluar, e hapur dhunshëm katër dyer të zyrave të administratës në katin e dytë tek zyra e kryetarit, sekretarit, arkëtarit dhe atë të depos, dhe se hajnat kanë hapur dhunshëm kasafortën e kyçur të arkës në zyrën e arkëtarit, ku ata konsiderohet se nga aty kanë marrë mjete në vlerë prej 1,086.30 euro”, thuhet në njoftimin e BIK-ut.

Po ashtu, BIK njofton se rasti është raportuar në polici, ndërsa theksohet se personat që kanë thyer zyrat kanë demoluar dokumentacionin e arkivit të këtij Këshillit në zyrën e arkëtarit.

“Rasti është raportuar edhe në polici, të cilët kanë dalë në vendin e ngjarjes dhe kanë bërë incizimin dhe regjistrimin e dëshmive të mundshme në vendngjarje. KBI në Kamenicë apelon tek institucionet e sigurisë që rasti në fjalë të hetohet sa më shpejt që është e mundur dhe kryesitë e kësaj vepre kriminale të vihen para drejtësisë”, thuhet në fund të njoftimit..

Lidhur me rastin, “Betimi për Drejtësi” ka kontaktuar komandantin e Stacionit Policor në Kamenicë, Florim Klaiqi, i cili ka deklaruar se policia ka dalë në vendin e ngjarjes dhe rasti me urdhër të prokurorit është iniciuar si vjedhje e rëndë.

“Është vjedhë një shumë e parave, ëshë demoluar objekti në fjalë dhe jemi duke u marrë me rastin. Jemi në hetim e sipër dhe për momentin nuk mundemi me dhënë informacion më të detajuar”, ka thënë Klaiqi. /BetimipërDrejtësi

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë