TETË MUAJ DËNIM ME BURG PËR VJEDHJE

Raporton: Syzana REXHEPI

Gjilan – Kujtim Haziri është dënuar me burgim në kohëzgjatje prej tetë muajve për veprën penale “vjedhje e rëndë”. Shpallja e aktgjykimit është bërë të enjtën në Gjykatën Themelore në Gjilan.

Haziri akuzohet se më 1 janar 2012 rreth ores 3:00, në lagjen Dardania në Gjilan me qëllim të përfitimit të kundërligjshëm pasuror për vete, kishte hyrë në shtëpinë e Bedri Abdylit për të vjedhur. I akuzuari fillimisht kishte hapur dritaren e katit përdhesë dhe kishte hyrë brenda dhe kishte vjedhur ari, dy TV të tipit sony, dy llaptop si dhe shumë gjëra tjera. Më vonë sendet e vjedhura i ka shitur, ku arin ja kishte shitur Bashkim Kaqiut për çmim prej 5380 euro, ndërsa  dy TV-të ja kishte shitur Bashkim Ibrahimit për çmimin prej 350 euro. Pas zhvillimit të hetimeve  nga Njësia e Hetimeve të Stacionit Policor të Gjilanit dy TV-të dhe llaptopi janë gjetur dhe ju kanë kthyer të dëmtuarit. Në këtë mënyrë të dëmtuarit i kanë shkaktur dëm material në vlerë të pa caktuar.

Prokurorja Rozelinda Hasani, tha se i akuzuari e ka kuptuar aktakuzën, ndërsa lidhur me fajësinë ai ka deklaruar se e pranon fajësinë, por shtoi që këtë vepër e ka kryer për shkak që ka qenë nën ndikimin e drogës.

Gjykatësi individual Behar Ymeri, në vazhdim  mori aktvendim me të cilin u pranua pranimi  i fajësisë nga i akuzuari dhe gjithashtu duke u bazuar në propozimin e palëve në procedurë shpalli aktgjykim me të cilin i akuzuari Kujtim Haziri u shpall fajtor për  veprën penale “vjedhje e rëndë” dhe të njëjtit i ka shqiptuar dënimin me burgim efektiv në kohëzgjatje prej tetë muajve.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë