Suspendohet nga puna u.d i drejtorit të Spitalit të Ferizajt, i cili u arrestua nën dyshimin për korrupsion

Raporton: “Betimi për Drejtësi”

Shërbimi Spitalor Klinik dhe Universitar i Kosovës (ShSKUK) ka njoftuar se është larguar nga puna përkohësisht U.D i drejtorit të Spitalit të Përgjithshëm në Ferizaj, Halit Gërbeshi, i cili është ndaluar për 48 orë, nën dyshimin se i njëjti ka përdorë naftën e spitalit për makinën e tij private.

ShSKUK njofton se ky vendim është marrë pasi i dyshuari është ndaluar nga Prokuroria Themelore në Ferizaj, nën dyshimin për keqpërdorim të detyrës zyrtare.

“Shërbimi Spitalor Klinik dhe Universitar i Kosovës informon opinionin se pas njoftimit për ndalimin e Dr. Halit Gërbeshit U.D. Drejtor i Spitalit të Përgjithshëm në Ferizaj prej 48 orësh nga Prokuroria Themelore e Ferizajt, i njëjti është larguar përkohësisht nga puna, konform legjislacionit në fuqi”, thuhet në njoftim.

Në njoftim thuhet se detyrat dhe përgjegjësitë e drejtorit të Spitalit në Ferizaj do t’i kryejë drejtori mjekësor i spitalit.

Ndryshe, Prokuroria Themelore në Ferizaj, të premten njoftoi lidhur me arrestimin e të dyshuarit.

“Pas një hetimi një mujor nga ana e Prokurorisë, me vendim të Prokurorit të Shtetit, ka ndaluar të dyshuarin H.G., në kohëzgjatje prej 48 orësh, pasi dyshohet se i njëjti ka kryer veprën penale “Keqpërdorimi i pozitës apo autoritetit zyrtar” nga neni 414 të Kodit Penal të Republikës së Kosovës (KPRK)”, thuhej në njoftim. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë