S’ka prova se njëri i akuzuar u ftua me rregull, shtyhet gjykimi se morën letër mbi 200 euro duke u paraqitur si punëtorë të “Infinit”

Raporton: Elmaze GËRGURI- HALITI

Prishtinë – Për shkak se gjykata nuk ka prova se i akuzuari Getoar Jusufi është ftuar me rregull, është shtyrë gjykimi në rastin ku së bashku me Shkodran Mazrekajn po akuzohen se duke u paraqitur rrejshëm si punëtorë të firmës “Infinit” kanë sjellë në lajthim firmën “Euro Print” dhe kishin marrë letër në vlerë 242 euro e 50 centë.

Për mungesën e të akuzuarit Jusufi, gjykatësja Donika Shala- Avdyli deklaroi se deri në kohën e mbajtjes së kësaj seance, gjykata nuk ka pranuar fletëkthesën, për të konstatuar nëse i njëjti është ftuar në mënyrë të rregullt, raporton “Betimi për Drejtësi”.

Kurse, për sigurimin e prezencës së tij në seancat e radhës, gjykatësja Shala- Avdyli tha se pasi që të konstatohet se i njëjti ka pranuar ftesën, gjykata do të ndërmarrë veprimet e nevojshme procedurale.

Meqenëse nuk u plotësuan kushtet për mbajtjen e këtij shqyrtimit fillestar, seanca e sotme u shty, ndërsa ajo e radhës mbetet e pacaktuar.

Ndryshe, të pranishëm në këtë seancë ishin prokurorja Ajshe Ferati dhe i akuzuari Shkodran Mazrekaj.

Sipas aktakuzës së ngritur në shkurt të 2017-ës, Getoar Jusufi dhe Shkodran Mazrekaj, po akuzohen duke u prezantuar rrejshëm kanë përfituar para në mënyrë të kundërligjshme.

Në aktin akuzues thuhet se në janar të 2016-ës, në Lagjen “Emshir” në Prishtinë, të akuzuarit Jusufi dhe Mazrekaj, në bashkëkryerje kanë shkuar në firmën “Euro Print” dhe kanë sjellë në lajthim personelin e firmës, me anën të fshehjes së fakteve kinse janë punëtorë të firmës “Infinit” dhe kanë porositur dhe më pas kanë marrë letër në vlerë prej 242 euro e 50 centë.

Të njëjtit personelin e firmës “Euro Print” e kanë shtyrë të veprojë në dëm të pasurisë së tij duke i shkaktar dëm pasuror në vlerë prej 242 euro e 50 centë.

Me këtë, Jusufi dhe Mazrekaj po akuzohen se kanë kryer veprën penale, “Mashtrimi” nga neni 335, paragrafi 1 lidhur me nenin 31, të Kodit Pena, vepër kjo e dënueshme me gjobë dhe burgim tre muaj deri në tri vite. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë