SHTYHET SEANCA PËR KORRUPSION KUNDËR ZYRTARIT TË PYJEVE

Raporton: Syzana REXHEPI

Gjilan – Në Gjykatën Themelore në Gjilan, të mërkurën, është shtyrë seanca e shqyrtimit gjyqësor ndaj Sabri Miftarit, i akuzuar për veprën penale të keqpërdorimit të pozitës apo autoritetit zyrtar.

Seanca është shtyrë, pasi mbrojtësi i të akuzuarit Sabri Miftari, avokati Sherif Sherifi, e ka njoftuar gjykatën se ai dhe i mbrojturi i tij ende nuk kanë marrë përgjigje në lidhje me kërkesën për hudhjen e aktakuzës, të cilën e kishte paraqitur pas shqyrtimit fillestar. Mirëpo gjatë seances u njoftua nga kryetarja e trupit gjykues Emine Salihu se kërkesa për hudhjen e aktakuzës është refuzuar.

Kryetarja e trupit gjykues mori aktvendim që seanca të shtyhet që mbrojtësit të të akuzuarit, t’i dorëzohet aktvendimi mbi refuzimin e kërkesës për hudhjen e aktakuzës nga ana e gjykatës, në mënyrë që mbrojtësi të ketë mundësi për parashtrimin e ankesës kundër këtij aktvendimi.

Ky shqyrtim gjyqësor zhvillohet në bazë të aktakuzës së Prokurorisë Themelore në Gjilan, ku Sabri Miftari, akuzohet se nuk e ka përmbushur detyrën zyrtare si roje e pyllit, ashtu që në sipërfaqen e pyllit – Njësia Menaxhuese Kopilaq, tereni Letenicë dhe Stanqiq më 4 mars 2013, nga Agjencioni Pyjor i Kosovës është konstatuar dëmi i përgjithshëm prej 839.32 m2, nga të cilat të pa arsyetuara me fletëparaqitje kanë qenë 325.61 m2, edhe pse ka qenë i obliguar që këto dëme t’i raportoj në Njësinë e AKP-së në Viti, dhe me këto veprime u ka mundësuar përfitim material prerësve  ilegal të pyllit.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë