Shtyhet seanca ndaj të akuzuarit Imri Bajrami

Raporton: Valdet HAJDINI

Prishtinë, 5 shkurt – Seanca gjyqësore e paraparë për tu mbajtur të premten në Gjykatën Themelore në Prishtinë ndaj të akuzuarit për shpërdorim të detyrës zyrtare Imri Bajrami është shtyrë për 1 prill 2016. Shtyrja e seancës është bërë për shkak të mungesës së dy dëshmitarëve, të cilët ishin ftuar për të dëshmuar në këtë rast. Kjo është bërë e ditur të premten nga Kryetarja e Trupit Gjykues, Valbona Musliu – Selimaj.

Ky proces gjyqësor zhvillohet sipas aktakuzës së ngritur nga ish-Prokuroria Publike Komunale në Prishtinë më 30 qershor 2010. Sipas aktakuzës, Imri Bajrami akuzohet për veprën penale “Shpërdorim i pozitës zyrtare ose autorizimit”, ndërsa në të njëjtin akt akuzues ishte edhe Artan Zhitia, për veprën penale “Dhënia e ryshfetit”, por ndaj tij është hudhur aktakuza për shkak të arritjes së afatit të parashkrimit të ndjekjes penale.

Sipas pretendimit të prokurorisë, i akuzuari Imri Bajrami si polic hetues më 13 janar 2009, në një kafene në Prishtinë kishte marrë ryshfet 5000 euro nga tani i ndjeri Beqir Kastrati. Ky i fundit, këto para i kishte marrë nga Arben Zhitia, i cili e kishte mik tani të ndjerin Beqir Kastrati. Arsye pse ishte bërë ky pazar, sipas prokurorisë, ishte për tu liruar nga burgu babai i Artanit – Ismajl Zhitia, i cili po vuante një dënim me burgim. Seanca për këtë rast është caktuar të mbahet më 1 prill 2016 në orën 13:00 në Gjykatën Themelore në Prishtinë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë