Shpallet i pafajshëm i akuzuari për aksidentin e shkaktuar në 2019-ën

Raporton: Donjeta AJVAZI

Prishtinë – Pasi pranoi fajësinë në seancën fillestare të mbajtur të martën, Gjykata Themelore në Prishtinë e ka liruar nga dënimi të akuzuarin H.H se kishte shkaktuar aksident me veturë në Prishtinë.

Shpallja e aktgjykimit u bë të mërkurën nga gjykatësi i rastit Ngadhnjim Arrni, raporton ‘’Betimi për Drejtësi’’.

I njëjti konstatoi se deri tek marrja e këtij vendimi erdhi si rezultat i faktit se nga aksidenti i shkaktuar kanë pësuar dëm vetëm familjarët e të akuzuarit.

Përndryshe i akuzuari kishte pranuar fajësinë pas leximit  të aktakuzës nga prokurori Menduhi Kastrati.

Sipas këtij aktgjykimi i akuzuari është obliguar t’i paguajë shpenzimet e paushallit gjyqësor në shumën prej 20 euro dhe 40.88 euro për ekspertizën  e komunikacionit.

Pala e dëmtuar është udhëzuar për kontest civil, mirëpo e njëjta nuk ka parashtruar kërkesë pasurore juridike.

Përndryshe, sipas aktakuzës së ngritur në tetor të vitit 2019 nga Prokuroria Themelore në Prishtinë, i akuzuari derisa po drejtonte automjetin e tij nga pakujdesia shkel rregullat e trafikut rrugor , ashtu që gjatë lëvizjes me automjet nuk  e mbanë shiritin e vet të drejtimit të lëvizjes, ku   me pjesën e përparmë të automjetit e godet automjetin që ishte duke u drejtuar djathtas.

Si pasojë  e kësaj shkakton aksident trafiku , ku sipas ekspertizës mjeko-ligjore lëndime të rënda  trupore pëson pasagjerja H.H dhe lëndime të lehta pëson Pasagjerja tjetër H.H si dhe vet i pandehuri H.H.

Më këtë po akuzohet se ka kryer veprën penale ‘’ Rrezikim i trafikut rrugor’’ nga neni 370 par.8 lidhur me par.6 dhe par.1 të KPRK-së. /BetimipërDrejtësi

 Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë