Shpallet  i  pafajshëm  Fejzulla  Avdyli  i akuzuar  për  korrupsion

Gjilan – Fejzulla Avdyli i akuzuar për veprën penale “ keqpërdorim i pozitës zyrtare”  është shpallur i pafajshëm të premten  në Gjykatën Themelore në Gjilan.

Trupi Gjykues i Departamentit për Krime të Rënda, i kryesuar nga gjykatësja Emine Salihu, tha se aktgjykimi lirues është marrë për shkak se nuk është vërtetuar se i pandehuri ka kryer veprën penale me të cilat akuzohet.

Ky proces gjyqësor  u zhvillua në bazë të aktakuzës së Prokurorisë Themelore në Gjilan,  sipas së cilës Fejzulla Avdyli akuzohet se gjatë periudhës  kohore 2007-2008, na cilësinë e inkasantit në kompaninë “Higjena” ka kryer veprën penale “keqpërdorim i pozitës zyrtare”. Gjatë asaj periudhe, Avdyli ka keqpërdorur mjete financiare të cilat i kishte arkëtuar nga klientë të ndryshëm të kompanisë, ashtu që një pjesë të parave që i kishte arkëtuar në mënyrë të kundërligjshme, me qëllim të përfitimit e të dobisë pasurore, i kishte ndalur për veti. Me këtë veprim ai kishte dëmtuar kompaninë në fjalë në shumën prej 2.425.16 euro.