SHPALLEN TË PAFAJSHËM GJYKATËSI BEHAR YMERI DHE EKSPERTI MJEKO-LIGJOR NAIM HALITI

Raporton: Verona KADRIU

Ferizaj– Gjykata Themelore në Ferizaj, të premten ka shpallur të pafajshëm gjyqtarin Behar Ymeri i akuzuar për nxjerrje të kundërligjshme të vendimit gjyqësor dhe ekspertin mjeko-ligjor Naim Halitin për keqpërdorim të detyrës apo autoritetit zyrtar. Të njëjtit nuk ishin prezent gjatë shpalljes së këtij aktgjykimi.

Krytari i trupit gjykues Musa Konxheli, deklaroi se gjatë gjithë seancave të mbajtura për këtë çështje penale, nga të gjitha provat e administruara dhe provat e tjera materiale që gjendeshin në shkresat e lëndës, si dhe nga vet deklaratat e të pandehurëve nuk është gjetur asnjë element i kryerjes së veprave penale. Me këtë rast, pasi që nuk është arritur të vërtetohet gjendja faktike e përshkruar me aktakuzën e ngritur ndaj dy të pandehurëve, të njejtit nuk u gjetën fajtor dhe u liruan nga akuza.

Sipas aktakuzës së ngritur nga Prokuroria Themelore në Prizren, i pandehuri Behar Ymeri akuzohej se si gjykatës në Gjykatën Themelore në Gjilan kishte nxjerrë një vendim të kundërligjshëm.  Prokuroria pretendonte se me anë të atij vendimi, gjyqtari aprovonte kërkesën e prokurorit për dhënie të urdhërit ndëshkimor, përkundër faktit se para se të merrte aktgjykimin për aksidentn e shkaktuar në të cilin kishte mbetur e lënduar Blerta Halimi, kishte ofruar prova të reja në të cilat ishte konstatuar gjendja e re faktike, ku natyra e lëndimeve kishte rezultuar me pasoja të rënda dhe të përhershme. Në këtë mënyrë me nxjerrjen e aktgjykimit në fjalë i kishte shkaktuar dëme të dëmtuarës në fjalë.

Ndërsa i pandehuri tjetër Naim Haliti, akuzohej se si ekspert mjeko-ligjor kishte tejkaluar kompetencat dhe nuk kishte përmbushur detyrat zyrtare . I njëjti me rastin e dhënies së konkluzionit të datës 11 dhjetor 2012 lidhur me natyrën e lëndimeve të dëmtuarës Blerta Halimi ,në kundërshtim me realitetin që rrjedh nga aksidenti rrugor dhe raporti mjekësor të lëshuar nga spitali si dhe gjendjes së pacientës Blerta Halimi, e cila ishte e shtruar në Qendrë Klinike Universitare të Kosovës në Prishtinë, i kishte kualifikuar dëmtimet e shkaktuara nga aksidenti rrugor si lëndim të lehtë trupor, përkundër se në rastin konkret lëndimet kanë qenë të rënda.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë