Rigjykimi për vrasjen e shokut shkaku i borxhit, e dëmtuara refuzon të përgjigjet në shumicën prej pyetjeve të mbrojtjes

Raporton: Arlinda MUQA

(Përditësuar, ora 22:20)- Në seancën e së premtes ndaj të akuzuarit Kreshnik Haliti, i cili ngarkohet se e kishte privuar nga jeta shokun e tij viktimën M.Z, për borxh, bashkëshortja e tij- e dëmtuara Mirjeta Zekaj refuzoi të përgjigjet në shumicën e pyetjeve të mbrojtjes së të akuzuarit, për shkak se e njëjta tha se iu ishte përgjigjur disa herë atyre pyetjeve.  

E dëmtuara Zekaj, shumicës së pyetjeve të mbrojtësit të të akuzuarit Haliti, avokatit Besnik Berisha, nuk iu përgjigj me pretendimin se nuk e di dhe në të shumtën e rasteve tha që iu ishte përgjigjur pyetjeve të tilla më herët, raporton “Betimi për Drejtësi”.

E dëmtuara Zekaj u dëgjua në seancën e së premtes, para se gjendja e të akuzuarit të përkeqësohej.

Fillimisht, kryetari i trupit gjykues Murat Hulaj iu propozoi palëve që të dëgjohej dëshmitari Driton Zekaj, vëllai i të ndjerit, i cili kishte ardhur nga jashtë Kosovës.

Një propozim të tillë e kundërshtoi prokurorja Lumturije Vuqetaj, e cila tha se nuk kishte parë ndonjëherë të veprohet kështu, që të ndërpritet dëgjimi i njërit për të vazhduar me tjetrin.

Andaj, prokurorja propozoi që të vazhdohet me dëgjimin e të dëmtuarës Zekaj.

E pyetur nga avokati Berisha, lidhur me pagesën e borxhit, kur është marrë, vlera e tij, pse ishte marrë një kredi e tillë, e pyetje të ngjashme, e dëmtuara u përgjigj duke thënë se nuk i kujtohet dhe nuk e di dhe se për të shumtat tha se ishte përgjigjur seancat e kaluara dhe nuk e sheh të nevojshme të përgjigjet prapë.

Në pyetjet tjera, lidhur me shtëpinë e blerë, ku avokati ia përmendi edhe deklarimin në prokurori, ajo tha se është e vërtetë se shtëpinë e kishin blerë në vitin 2016, por që të njëjtës nuk i kujtohen datat e sakta, por vetëm muaji dhjetor.

Zekaj gjithashtu tha se shtëpia ishte blerë së bashku me kunetërit e saj, por tjetër është se ajo jeton vetëm me vjehrrin e saj në atë shtëpi.

E pyetur se borxhi i kërkuar, të cilin kishte thënë më herët dhe që thotë se ende paguan kredi për të, a ishte marrë para se ta kishin blerë shtëpinë apo pas saj, ajo u përgjigj se ishte pyetje shumë e paqartë dhe nuk përgjigjet.

Ndërsa, kur u pyet për deklaratat që për dhënien e atij borxhit ishte krijuar një kontratë, të akuzuarit Haliti iu përkeqësua gjendja shëndetësore, të cilin u detyruan ta dërgojnë në spital për trajtim të menjëhershëm.

E që më pas, seanca më nuk vazhdoi pasi që u bë e ditur se të akuzuarit Haliti, i ishte rekomanduar që të trajtohet në qendrën mjekësore për shkak të shtypjes së lartë të pulsit dhe tensionit.

Në këto rrethana, trupi gjykues mori vendim që seancat e radhës të caktohen për 31 maj, 17 dhe 20 qershor.

 

Rigjykimi për vrasjen shkaku i borxhit, të akuzuarit i përkeqësohet gjendja gjatë seancës dhe merr trajtim nga ndihma e shpejtë në gjykatë

Pejë- Në Gjykatën Themelore në Pejë, të premten ka vazhduar rigjykimi ndaj të akuzuarit për vrasje të rëndë Kreshnik Haliti, të cilit i është përkeqësuar gjendja gjatë seancës, andaj është detyruar të marrë trajtim nga ndihma e shpejtë në gjykatë.

Haliti ngarkohet për vrasjen e shokut të tij Mentor Zekaj për një borxh, afro 77 mijë euro, raporton “Betimi për Drejtësi“.

Në seancën e së premtes po dëgjohej e dëmtuara në cilësi të dëshmitares, Mirjeta Zekaj, por në një moment, i akuzuari Haliti tha se nuk po ndjehet mirë dhe ndihma e shpejtë arriti në gjykatë për t’i dhënë trajtimin e nevojshëm.

Në këto rrethana, gjykata mori vendim që seanca të shtyhet për një orë, derisa i akuzuari ta marrë trajtimin e duhur mjekësor, për të parë gjendjen e tij e më pas për të parë nëse mund të vazhdohet me seancë.

Ndryshe, pasi ish-kryetarja e trupit gjykues, Lumturije Muhaxheri ka ndërruar jetë,  gjykimi po vazhdon me trupin e ri gjykues, tani këtë lëndë e gjykon trupi gjykues i kryesuar nga gjykatësi Murat Hulaj, me anëtarët Sami Sharraxhiu dhe Musë Povataj.

Gjykata Themelore në Pejë, më 4 korrik të vitit 2018, e kishte gjetur fajtor të akuzuarin Kreshnik Haliti, ndaj të cilit kishte shqiptuar dënim unik prej 22 vite e gjashtë muaj burgim, nën akuzat për vrasje të rëndë dhe armëmbajtje pa leje.

Mirëpo, Gjykata e Apelit kishte anuluar aktgjykimin e shkallës së parë, me arsyetimin se aktgjykimi ishte i përfshirë në shkelje të procedurës penale dhe vërtetimin jo të plotë të gjendjes faktike. 

Kreshnik Haliti akuzohet se më 6 mars 2017, në rrugën “Myrvete Maksutaj”, në Pejë, me dashje dhe me qëllim të përfitimit të dobisë pasurore e ka privuar nga jeta viktimën, tani të ndjerin Mentor Zekaj.

Sipas aktakuzës, këto veprime kanë ardhur për shkak të një mosmarrëveshje që kanë pasur ndërmjet vete tani i ndjeri Zekaj me të pandehurin Kreshnik Haliti, lidhur me një borxh prej afro 77 mijë euro.

Gjithnjë sipas aktakuzës, i pandehuri në ditën kritike i përgatitur për vrasjen, e thërret viktimën për të shkuar në qendër të Pejës, me ç’rast me makinën e tij viktima ka shkuar e ka marrë të pandehurin, ku në veturë kanë biseduar për borxhin, ashtu që sapo kanë arritur në vendin kritik, i pandehuri e godet dy herë me një revole të modelit “Pietro Beretta M-70”, e kalibrit 7.65x17mm.

Për këtë, akuzohet se ka kryer veprën penale “Vrasje e rëndë”, sipas nenit 179, paragrafi 1 të Kodit Penal, parashihet dënimi me jo më pak se dhjetë vjet burgim ose me burgim të përjetshëm. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë