PROKURORJA KËRKON SHTYRJEN E SEANCËS PËR KORRUPSION

Raporton: Valdet HAJDINI

Pejë – Prokurorja e shtetit, Sahide Gashi, ka kërkuar që të shtyhet seanca e së mërkurës, në rastin kundër të akuzuarve Arif Demhasaj, Avni Sinanaj dhe Ismi Ibërhysaj. Kërkesa e saj erdhi si pasojë e propozimit të mbrojtjes së të akuzuarve, për administrimin e provave shtesë.

Në fillim të shqyrtimit gjyqësor, avokatët mbrojtës Gëzim Kollçaku dhe Gëzim Baloku propozuan prova shtesë, për administrim gjatë procedurës së provave. Lidhur me këtë propozim, prokuroria e rastit tha se nuk mund të deklarohet në këtë seancë pasi që i nevojitet kohë për t’u konsultuar me shkresat e lëndës dhe përmbajtjen e këtyre provave, për të cilën arsye kërkoi edhe shtyerjen e seancës.

Pas kësaj kërkesë, trupi gjykues i kryesuar nga gjyqtarja Lumturije Muhaxheri, mori aktvendim që seanca e rradhës të caktohet për datën 19 maj 2016, në të cilën të akuzuarit do të japin mbrojtjen e tyre.

Ky shqyrtim gjyqësor po zhvillohet në bazë të aktakuzës së Prokurorisë Themelore në Pejë, ku sipas pretendimit të saj i akuzuari Arif Demhasaj, si person zyrtar-Pylltar në Agjensionin Pyjor të Kosovës, gjatë periudhës kohore 2011-2012, me qëllim të përfitimit të kundëligjshëm për tjetrin nuk i ka përmbushur detyrat zyrtare, duke u lejuar operatorëve ekonomik prerjen ilegale të pyjeve, me çka i ka shkaktuar dëme të konsiderueshmeAgjensionit Pyjor të Kosovës në shumën mbi 8.000,00 euro. I akuzuari Avni Sinanaj, si person përgjegjës i operatorit ekonomik,gjatë periudhës kohore 2011-2012, me qëllim të përfitimit të kundëligjshëm të dobisë pasurore për biznesin e tij, ashtu që me rastin e realizimin e punëve në pastrimin e pyllit, ka prerë ilegalisht drunjë, duke e dëmtuar Agjensionin Pyjor të Kosovës për shumën 1.815,00 euro. Ndërkaq, i akuzuari Ismi Ibërhysaj, si person përgjegjës i operatorit ekonomik, gjatë periudhës kohore 2011-2012, me qëllim të përfitimit të kundëligjshëm të dobisë pasurore për biznesin e tij, ashtu që me rastin e realizimin e punëve në pastrimin e pyllit, ka prerë ilegalisht drunjë, duke e dëmtuar Agjensionin Pyjor të Kosovës për shumën 825,00 euro.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë