Prokurorja e zënë në një rast tjetër, dështon gjykimi ndaj të akuzuarit për kontrabandimin e dy personave në vendet e BE-së

Raporton: Driton NOCAJ dhe Arlinda MUQA

Pejë- Në gjykatoren e Gjykatës së Pejës nuk ka arritur të vazhdojë procesi gjyqësor ndaj të pandehurit Fehmi Hakaj, ndaj të cilit rëndojnë akuzat se në vitin 2012 dhe 2014 për 2 mijë e 550 euro kishte kontrabanduar të dëmtuarin V.E dhe S.S jashtë shtetit të Kosovës.

Trupi gjykues i udhëhequr nga gjykatësi Shaqë Curri konstatoi se nuk kishte kushte për mbajtjen e gjykimit për shkak të mungesës së prokurores Valbona Disha-Haxhosaj, e cila kishte njoftuar Gjykatën se gjendej në një rast tjetër penal në Gjykatën Themelore në Ferizaj.

Në këtë seancë ishte i pranishëm i pandehuri dhe mbrojtësi i tij, avokati Gëzim Baloku.

Seanca e radhës u caktua më 21 shtator 2022, ora 09:30.

Ndryshe, sipas aktakuzës të ngritur nga Prokuroria Themelore në Pejë më 10 nëntor 2014, e ngarkon të pandehurin Fahmi Haklaj se në periudhën kohore të muajit prill 2012 në Istog ka bërë organizimin e rekrutimit e viktimave për kontrabandim.

Bazuar në aktakuzë, i pandehuri , të dëmtuarin V.E  në mënyrë ilegale e ka kontrabanduar që të njëjtin ta dërgojë nga Kosova për në Serbi e më pas në drejtim të Austrisë, Italisë, Zvicrës etj, duke ia marrë të dëmtuarit për këtë kontrabandim shumën prej 700 euro, ashtu që i pandehuri ka arrit që viktimën ta kontrabandojë jashtë shtetit të Kosovës.

-Me çka ekziston dyshimi i bazuar mirë se ka kryer veprën penale “Kontrabandimi me emigrant”, nga neni 170 par.1 të KPRK-së.

I pandehuri poashtu akuzohet se në muajin mars 2014 në Istog në këmbim të shumën prej 1850 euro kishte kontrabanduar në drejtim të shtetit të Austrisë të dëmtuarin S.B.

-Me çka ekziston dyshimi i bazuar mirë se ka kryer veprën penale “Kontrabandimi me emigrant”, nga neni 170 par.1 të KPRK-së./BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë