Prokurorja Dulina Hamiti në trajnim, nuk e njofton gjykatën, shtyhet seanca për korrupsion

Raporton: Valdet HAJDINI

Prishtinë – Seanca e paraparë të mbahej të premten, kundër mjekëve të Qendrën Klinike Universitare të Kosovës-QKUK, Kushtrim dhe Sabahate Gashi, është shtyrë për shkak të mungesës në seancë të prokurores së rastit Dulina Hamiti.

Gjyqtari Valon Kurtaj i telefonoi prokurores Hamiti, për ta pyetur pse nuk kishte ardhur në gjykatë, e njëjta u përgjigj se është në një trajnim dhe se nuk ka mundur të vijë në seancë.

Ndryshe, prokurorja Hamiti ka qenë e njoftuar për datën e mbajtës së seancës, por që mungesën e vet nuk e ka arsyetuar dhe as nuk e ka njoftuar gjyqtarin Kurtaj për mungesën e saj.

Ky gjykim po zhvillohet në bazë të aktakuzës së Prokurorisë Themelore në Prishtinë, e cila pretendon se të mjekët e QKUK-së, Kushtrim Gashi dhe Sabahate Gashi, kanë keqpërdorur detyrën e tyre zyrtare duke vjedhur barna nga lista esenciale. Sipas prokurorisë, gjatë kontrollit nga Policia e Kosovës në shtëpinë e të akuzuarve janë gjetur pajisje mjekësore, në bazë të së cilës vërtetohet se të njëjtit pa autorizim kanë ushtruar veprimtari mjekësore. Prokuroria pretendon se këtë veprimtari të akuzuarit e kanë ushtruar në Ordinancën Specialistike “Kirurgjike Proktologjike”, duke bërë ndërhyrje tek pacientë të ndryshëm, si dhe duke i sjellë vetit përfitim pasuror të kundërligjshëm në vlerë rreth 13,992 euro.

Ndërkaq, dispozitivi i dytë ngarkon të njëjtit me veprën penale “ushtrimi i kundërligjshëm i veprimtarisë mjekësore ose farmaceutike”. Të pandehurit akuzohen se prej vitit 2001 e deri më 20 maj 2015, kanë punuar në ordinancën e tyre specialistike pa autorizim ligjor dhe pa licencë nga Ministria e Shëndetësisë. Më pas të pandehurit pretendohet se kanë vjedhur produktet medicinale, me qëllim të shitjes për pacientët e trajtuar në ordinancën e tyre. Prokuroria pretendon se produkte medicinale me banderola të Ministrisë së Shëndetësisë, janë gjetur gjatë kontrollit në ordinancën në fjalë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë