Pranojnë fajësinë dy të akuzuarit për posedim dhe shpërndarje të narkotikut në Burgun e Dubravës

Raporton: Arlinda MUQA

Pejë- Dy të akuzuarit I.B dhe A.Z, u deklaruan fajtorë për posedim dhe shpërndarje të narkotikut, në rastin ku e akuzuara Z. ngarkohet se ishte detyruar që t’ia dërgojë të akuzuarit B., të dënuar në Burgun e Dubravës, narkotikun e llojit marihuanë, në peshë prej 25 gramë.

Pranimin e fajësisë, dy të akuzuarit e bënë pas leximit të aktakuzës nga ana e prokurores Valbona Disha- Haxhosaj, ku të dytë shprehen keqardhje ndaj gjykatës, raporton “Betimi për Drejtësi”.

Me pranim të fajësisë nga ana e të akuzuarve, u pajtua prokurorja Disha- Haxhosaj, ku e njëjta deklaroi se ka mbështetje edhe në provat materiale, për çka i propozoi gjykatës që t’ua aprovojë pranimin e fajësisë.

Tutje, mbrojtësi i të akuzuarit I.B, avokati Xhelal Radoniqi, propozoi që të pranohet pranimi i fajësisë, pasi që i njëjti është i vullnetshëm dhe në konsultim paraprak me të si mbrojtës i tij.

Kurse, mbrojtësja e të akuzuarës A.Z, avokatja Pranvera Ukaj lidhur me pranimin e fajësisë nga ana e të akuzuarës deklaroi se e përkrah pranimin e fajësisë nga ana e të mbrojturës së saj, e cila pranimin e fajësisë e bëri pas konsultimit me të si mbrojtëse. Andaj, kërkoi që gjykata t’ia aprovojë pranimin e fajësisë.

Pas kësaj, gjyqtari i vetëm Sami Sharraxhiu, ua aprovoi pranimin e fajësisë, nga dy të akuzuarve për veprat penale për të cilat akuzohen.

Ndërsa, lidhur me përcaktimin e llojit dhe lartësisë së dënimit ndaj të akuzuarit B., prokurorja  i propozoi gjykatës që si rrethanë lehtësuese ta vlerësojë pranimin e fajësisë, ndërsa si rrethanë rënduese faktin se i njëjti ka qenë i dënuar për vepër penale të vjedhjes së rëndë.

Kurse, në raport me të akuzuarën Z. prokurorja deklaroi se si rrethanë lehtësuese ta vlerësojë pranimin e fajësisë si dhe faktin se e njëjta nuk ka rënë ndesh me ligjin asnjëherë më parë, kurse rrethana rënduese nuk kishte gjetur tek ajo.

Ndërsa, mbrojtësi i të akuzuarit B., avokati Xhelal Radoniqi, deklaroi se pranimi ishte i vullnetshëm dhe i mbrojturi i tij kishte pendim të thellë dhe ndjen keqardhje ndaj të akuzuarës Z., sipas tij kjo e fundit ishte viktimë e të akuzuarit.

Ai kërkoi që ndaj të mbrojturit të tij të shqiptohet dëmin sa më i butë.

“Më vjen keq për rastin që ka ndodhur, ndjej keqardhje për A. të njëjtën e kam detyruar që të ma sjell substancën narkotike, ajo nuk ka qenë e vetëdijshme për dënimin, sepse unë e kam gënjyer i kam thënë edhe nëse ndodh diçka veprën penale nuk do ta pranoj”, tha i akuzuari B.

Tutje, mbrojtësja e të akuzuarës, avokatja Pranvera Ukaj, deklaroi se e përkrah propozimin e prokurores që në raport me të mbrojturën e saj, në përcaktimin e llojit të dënimit dhe lartësisë së tij, si rrethana lehtësuese të merret pranimi i fajësisë dhe faktin se është hera e parë që e njëjta bie ndesh me ligjin, andaj kërkoi t’i shqiptohet dënim nën minimumin e paraparë me ligj.

Pas kësaj, gjyqtari Sharraxhiu mori vendim që shpallja e aktgjykimit do të bëhet më 15 qershor 2022.

Ndryshe, sipas aktakuzës së ngritur nga Prokuroria Themelore në Pejë ndaj I.B dhe A.Z, më 15 maj 2022, në Qendrën Korrektuese- Dubravë, i akuzuari I.B në sallën e vizitave pa autorizim ka poseduar substanca narkotike në brendi të institucionit korrektues.

Sipas aktakuzës, oficerët korrektues gjatë vrojtimit të kamerave në dhomën e kontrollit kanë vërejtur lëvizje të dyshimta të vizitores- të akuzuarës A.Z, dhe të dënuarit I.B, ku në një moment vërehet e akuzuara Z, duke nxjerrë diçka nga trupi dhe duke ia lëshuar në dorë të akuzuarit B., me ç’rast menjëherë në sallë të vizitave kanë shkuar Departamenti i Stafit të Sigurisë dhe së bashku me stafin e sallës së vizitave kanë tërhequr nga salla të akuzuarën dhe të burgosurin.

Aktakuza thotë se gjatë bastisjes i gjejnë dhe sekuestrojnë një pako të vogël të mbështjellë, ku në brendësi të saj kishte substancë narkotike të dyshuar, e cila ka rezultuar të jetë marihuanë me peshë 25 gramë.

Për çka, I.Z ngarkohet se ka kryer vepër penale “Posedim i paautorizuar i narkotikëve, substanca psikotrope ose analoge” nga neni 269, par.1 lidhur me nenin 275, par.1 pika 1.8 të Kodit Penal, e cila dënohet me gjobë ose me burgim prej 3 deri në 15 vite.

Sipas aktakuzës, për të njëjtat veprime si më lartë po akuzohet e akuzuara A.Z, për kryerjen e veprës penale “Blerja, posedimi, shpërndarja dhe shtija e paautorizuar e narkotikëve, substanca psikotrope dhe analoge” nga neni 267, par.2 e lidhur me nenin 275, par.1, pika 1.8 të Kodit Penal, e cila dënohet me gjobë ose me burgim prej 3 deri 15 vjet. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë