Pranoi se përmes ‘Facebook-ut’ mashtroi mërgimtarin duke ia marrë 750 euro, dënohet me 100 ditë burgim me kusht dhe 200 euro gjobë

Raporton: Blerim JAKUPI

Gjilan – I akuzuari P.B., është dënuar me 100 ditë burgim me kusht si dhe 200 euro gjobë, pasi ka pranuar se në korrik të 2020-ës përmes rrjetit social “Facebook” e ka mashtruar të dëmtuarin, N.Sh., i cili gjendej në Milano të Italisë.

Prokuroria e ngarkonte atë se kishte hapur një e-mail të rremë me emrin e një kushëriri të të dëmtuarit, duke thënë se ndodhet në burg në Kosovë dhe se i duheshin 800 euro për të dalë nga burgu, me ç’rast nga i dëmtuari pranon 750 euro.

Aktgjykimi në fjalë është shpallur më 28 shtator të vitit të kaluar, nga gjykatësi i Gjykatës Themelore në Gjilan, Behar Yemri, pasi i akuzuari P.B. e ka pranuar fajësinë për veprën me të cilën ndarkohej, raporton “Betimi për Drejtësi”.

Ndërkaq, pala e dëmtuar, N.Sh. në këtë rast për realizimin e kërkesës pasurore-juridike është udhëzuar në kontest civil.

Prokuroria Themelore në Gjilan, më 16 shkurt 2021, ka ngritur aktakuzë ndaj P.B., me arsyetimin se ai në korrik të 2020-ës në Gjilan, me qëllim të përfitimit të kundërligjshëm pasuror për vete, përmes rrjetit social “Facebook” e ka mashtruar të dëmtuarin, N.Sh., i cili gjendej në Milano të Italisë.

Sipas prokurorisë, në atë mënyrë që i akuzuari e ka hapë një e-mail të rremë me emrin “L.L.” dhe të dëmtuarit i është paraqitur se kinse është  kushëriri i tij me emrin Sh. dhe se ndodhet në burg në Kosovë ku i kishte kërkuar para në shumë  prej 800 euro, kinse për të dalë nga burgu.

Në këtë rast, në aktakuzë thuhet se i dëmtuari i beson të akuzuarit dhe ia dërgon shumën prej 750 euro, me ç’rast i akuzuari ka marr këto para në filialin e “Money Gram”.

Me këtë, P.B. akuzohej se ka kryer veprën penale “Mashtrimi”, nga neni 323, paragrafi 1 të Kodit Penal, vepër kjo e dënueshme me me gjobë dhe me burgim prej tre muaj deri në pesë vjet. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë