POLICI DËNOHET ME GJASHTË MUAJ BURG PËR KORRUPSION

Raporton: Syzana REXHEPI

Gjilan – Agron Azemi është dënuar me burgim në kohëzgjatje prej gjashtë  muajve për veprën penale “keqpërdorim i pozitës apo autoriteti zyrtar “. Shpallja e aktgjykimit është bërë të hënën në Gjykatën Themelore në Gjilan.

Ky proces gjyqësor u zhvillua në bazë të aktakuzës së ngritur nga Prokuroria Themelore në Gjilan, ku i akuzuari Agron Azemi ngarkohet për veprën penale të keqpërdorimit të pozitës apo autoritetit zyrtar. Sipas pretendimit të prokurorisë, i akuzuari Azemi, më 15 korrik 2015, duke shfrytëzuar autoritetin zyrtar me qëllim që vetes t’i sjellë dobi të kundërligjshme pasurore, me dashje kishte hyrë në lokalin” Phonebok”, pronë e të dëmtuarit Flamur Ibrahimi ku ishte prezentuar si zyrtar policor dhe të njëjtin e kishte vënë në lajthitje dhe ia kishte marrë shumën prej 150.00 eurove. Ndërsa një ditë më vonë, kishte hyrë në lokalin “ Phonebok 2”, pronë e të dëmtuarit Besnik Ibrahimi ku është prezentuar si zyrtar policor dhe të njëjtin e kishte vënë  në lajthitje dhe ia kishte marrë shumën prej 120.00 eurove. Gjithashtu, më 14 korrik 2015 i akuzuari kishte hyrë në lokalin “T-Mobile Niki”, pronë e të dëmtuarit Fisnik Ibrahimi ku ishte prezantuar si zyrtar policor dhe të njëjtin e ka vënë në lajthitje, duke ia marrë një telefon  në vlerë prej 170.00 euro.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë