Arrestohen pesë persona për plagosjen e dyfishtë në Klinë

Raporton: “Betimi për Drejtësi”

(Përditësuar, ora: 19:00) Policia e Kosovës njofton se ka arrestuar pesë të dyshuar në lidhje me incidentin në Klinë ku mbetën të plagosur dy persona.

Sipas njoftimit policor, në rrugën “Abedin Rexha”, në orën 13:40, janë dëgjuar të shtëna me armë zjarri dhe disa persona janë rrahur mes vete, raporton “Betimi për Drejtësi”.

Për rastin, Policia i ka arrestuar pesë persona, përfshirë edhe dy të plagosurit, derisa janë konfiskuar 2 pistoleta, 15 fishekë, 2 gëzhoja, 1 brisk dhe 1 sprej.

Ndaj tyre janë iniciuar veprat penale “vrasje në tentativë” dhe “pjesëmarrje në rrahje”, ndërsa janë dërguar në mbajtje.

 

Plagosen dy persona me armë zjarri në Klinë

 

Klinë- Dy persona kanë mbetur të plagosur nga të shtënat me armë zjarri rreth orës 13:40 në Klinë.

Lajmin e ka konfirmuar për “Betimi për Drejtësi”, zëdhënësi i policisë për rajonin e Pejës, Driton Rugova, i cili tha se motivet e plagosjes së dyfishtë për momentin mbeten të panjohura.

“Rreth orës 13:40 policia është informuar se ka të shtëna me armë zjarri në Klinë, policia ka dalë në vendin e ngjarjes ku kanë takuar një person të plagosur. I plagosuri i dytë është dërguar në spital në Pejë”, tha Rugova.

Ai shtoi se në vendin e ngjarjes kanë dalë policia dhe se deri më tani nuk ka të arrestuar për këtë rast. /BetimipërDrejtësi

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë