Pas situatës së krijuar nga pandemia, Gjykata e Prizrenit nis përsëri mbajtjen e seancave të rregullta

GJ.Prizren (1)
Author

Raporton: Rystem HALIMI

Korrik 27, 2020

Prizren – Gjykata Themelore e Prizrenit, më 21 korrik, me kërkesë të Prokurorisë Themelore në Prizren, kishte anuluar mbajtjen e të gjitha seancave të rregullta, me përjashtim të rasteve të natyrës urgjente, për shkak se në stafin e prokurorisë kishin rezultuar dy raste pozitiv  me Covid-19.

Administratori i Prokurorisë Themelore të Prizrenit Xhemajl Qelaj, i kontaktuar nga “Betimi për Drejtësi”, kishte thënë se gjykata vazhdon të jetë në pushim deri më 27 korrik për shkak të dy rasteve pozitive të konfirmuara me Covid-19 në prokurori.

Pas kësaj, gjykata në fjalë, të hënën, ka vendosur të nis me mbajtjen e seancave të rregullta.

I kontaktuar nga “Betimi për Drejtësi”, ushtruesi i detyrës së kryetarit të Gjykatës Themelore në Prizren, gjykatësi Artan Sejrani bëri të ditur se nis mbajtja e të gjitha seancave, si penale ashtu edhe civile.

“Kërkesa e Prokurorisë ishte që anulimi i seancave të rregullta të pezullohen nga 21 e deri më  27 korrik, ku nga sot mbahen seancat e rregullta sipas orarit të caktuar paraprakisht”, ka thënë ai. /BetimipërDrejtësi