PALËT NUK I KANË PRANUAR SHKRESAT E LËNDËS, SHTYHET SEANCA FILLESTARE

Raporton: Adem KRASNIQI

Gjakovë – Seanca e shqyrtimit fillestar, e paraparë të mbahet të premtën në Gjykatën Themelore në Gjakovë, ndaj të akuzuarëve Afrim Radoniqi dhe Xhevat Rraci, nuk u mbajt. Kjo sepse të njëjtit deklaruan se nuk i kanë pranuar aktakuzat nga prokuroria. Mbrojtja e të akuzuarit Xhevat Rraci, avokati Hilmi Hoxha deklaroi se klienti i tij nuk e ka pranuar aktakuzën nga prokurori i shtetit Agron Matjani, dhe në këtë mënyrë mbrojtësit kërkuan që seanca të shtyhet.

”Klienti im nuk e din as për çka akuzohet dhe unë kërkoj nga gjykata që të shtyhet kjo seancë për një datë tjetër, që të pajisemi me shkresat e lëndës dhe të përgatitemi për shqyrtimin fillestar”, tha avokati Hilmi Hoxha.

Megjithatë kjo nuk ishte arsyeja e vetme për shtyerjen e kësaj seance. I akuzuari tjetër Afrim Radoniqi, kërkoi nga gjykata që të shtyhet seanca sepse avokati i tij Ndrec Doda nuk ishte prezent, dhe gjithashtu deklaroi as ai nuk e kishte marrë aktakuzën.

Bazuar në aktakuzën e prokurorisë, më 17 shtator 2012, Afrim Radoniqi në cilësinë e avokatit publik të Gjakovës dhe Xhevat Rraci në cilësinë e drejtorit në pran Drejtorisë për Gjeodezi Kadastër e Pronë të komunës së Gjakovës, kanë i shkaktuar dëm Komunës së Gjakovës. Këtë e kanë bërë në atë mënyrë që kanë arritur marrëveshje për kompensim me pronarin e mëparshëm të një prone Pren Ibishaj nga fshati Brekoc nga Komuna e Gjakovës, të cilit i njihet e drejta në shfrytzimin e përhershëm të ngastrës kdastrale nr.4452, me sipërfaqe prej 345 metra katrorë, pa obligim të kompensimit në emër të shfrytzimit dhe rregullimit të tokës ndërtimore. Sipas aktakuzës, shfrytëzuesi, pra Komuna e Gjakovës, obligohet t’i njeh këtë të drejtë pronarit të mëparshëm, kështu që Komuna e Gjakovës detyrohet të bëj ndryshimet adekuate në librat kadastralë në emër të Prenk Ibishaj si shfrytzues i përhershëm i palujtshmërisë duke i shkaktuar dëme materiale Komunës së Gjakovës. Me këtë aktakuza i ngarkon të pandehurit me veprën penale “keqpërdorimi i pozitës apo autoritetit zyrtar”.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë