NJË VIT E GJASHTË MUAJ BURGIM PËR PËRVETËSIM TË PALIGJSHËM

Raporton: Lutfi MORINA

Gjakovë – Në Gjykatën Themelore në Gjakovë, të hënën,  i akuzuari Arton Lumi, gjatë shqyrtimit fillestar, ka pranuar fajësinë për përvetësim të paligjshëm gjatë ushtrimit të detyrës, si zyrtar i kompanisë së sigurimeve “Dardania” në vlerë rreth 68 mijë euro, për të cilën vepër është dënuar me një vit e gjashtë muaj burgim.

Shqyrtimi ka filluar me leximin e aktakuzës nga prokurori i çështjes, Ali Selimaj, me të cilën e ngarkonte të pandehurin se kishte kryer veprën penale të përvetësimit të paligjshëm, ndërsa i akuzuari pas konsultimeve me avokatin e tij, Agim Haraçia, të cilin ia ka caktuar gjykata sipas detyrës zyrtare, ka pranuar fajësinë.

Kryetari i trupi gjykues, Artan Sejrani, ka shpallur aktgjykimin me të cilin e ka dënuar të pandehurin me burgim, në afat prej një viti e gjashtë muajsh, ndërsa kompaninë e sigurimeve “Dardania”, për kërkesën pasurore-juridike, e ka udhëzuar në kontest civil.

Në shtator të vitit të kaluar, Prokuroria Themelore në Gjakovë, kishte ngritur aktakuzë ndaj të pandehurit Arton Lumi, me të cilën e akuzonte se ka përvetësuar në mënyrë të paligjshme, gjatë ushtrimit të detyrës si zyrtar për inkasim, në kompaninë e sigurimeve “Dardania”, shumën prej rreth 68 mijë euro.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë