NGA 10 MUAJ BURGIM ME KUSHT DHE GJOBË 500 EURO PËR DY TË AKUZUARIT PËR SHPËRDORIM TË PASURISË SË HUAJ DHE KALLËZIM TË RREMË

Raporton: Verona KADRIU

Ferizaj – Të premten në Gjykatën Themelore në Ferizaj dy të akuzuarit Milazim Jakupi i cili akuzohej për veprën penale “shpërdorimi i pasurisë së huaj” dhe Rexhep Haliti i akuzuar për veprën penale “ndihmë në kryerjen e veprës penale shpërdorimi i pasurisë së huaj”, si dhe veprën penale në bashkëkryerje “lajmërimi apo kallëzimi i rremë” pasi kanë pranuar fajësinë janë dënuar me nga 10 muaj burg me kusht dhe 500 euro gjobë.

Shpallja e aktgjykimit është bërë të premten në Gjykatën Themelore në Ferizaj nga gjykatësi individual i çështjes Ilir Bytyqi

Milazim Jakupi i akuzuar për veprën penale “shpërdorimi i pasurisë së huaj” u dënua me burgim me kusht në kohëzgjatje prej dhjetë muaj dhe dënim me gjobë në shumë prej 300 euro. Po ashtu i pandehuri i dytë në këtë çështje penale Rexhep Haliti i akuzuar për veprën penale “ndihmë në kryerjen e veprës penale  të shpërdorimit të pasurisë së huaj” u dënua me burgim me kusht në kohëzgjatje prej dhjetë muaj si dhe dënim me gjobë në shumë prej 300 euro. Kurse për veprën penale në bashkëkryerje “lajmërimi apo kallëzimi i rremë”,  secilit veç e veç i’u shqiptua dënimi me gjobë në shumë prej 200 euro.

Sipas pikës 1 të aktakuzës së ngritur nga Prokuroria Themelore në Ferizaj, i pandehuri Milazim Jakupi akuzohej për veprën penale “shpërdorimi i pasurisë së huaj” sepse më 29 qershor 2013 në Ferizaj, në pompën e derivative “Euro Miti”,në cilësinë e punëtorit me qëllim të përvetësimit të sendeve të huaja të luajtshme e që vetës apo tjetrit t’i sjellë përfitim pasuror të kundërligjshëm, paraprakisht ka inskenuar rastin e grabitjes me bashkë të akuzuarin Rexhep Haliti dhe kanë përvetësuar të hollat në shumë 1500 euro.

Pika 2 e aktakuzës ngarkonte të pandehurin Rexhep Haliti për veprën penale “ndihmë në kryerjen e veprës penale shpërdorimi i pasurisë së huaj” sepse në të njëjtën datë, kohë dhe vend,  ka ndihmuar punëtorin Milazim Jakupi dhe paraprakisht janë marrë vesh që të inskenojnë rastin e grabitjes që në mënyrë të kundërligjshme të përvetësoj shumën prej 1500 euro.

Pika 3 e aktakuzës ngarkonte të pandehurit për veprën penale në bashkëkryerje “lajmërimi apo kallëzimi i rremë” nga sepse më 29 qershor 2013, rreth orës 01:00, në Ferizaj në bashkëkryerje janë marrë vesh dhe kanë lajmëruar rrejshëm personin zyrtar të ngarkuar për ndjekjen e personave të panjohur që kanë kinse kanë kryer veprën penale të grabitjes në atë mënyrë që gjersa i pandehuri Milazim Jakupi duke punuar në pompën e derivative “Euro Miti”, nën kërcënimin e mjetit të rrezikshëm- thikës i kanë marrë 1500 euro dhe janë larguar nga aty edhe pse të pandehurit e kanë ditur se vepra penale nuk është kryer.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë