NË SHTATOR FILLON GJYKIMI NDAJ DREJTORIT TË SPORTIT NË MNISTRINË E KULTURËS

Raporton: Lutfi MORINA

Prizren – Në Gjykatën Themelore në Prizren, të premten, është mbajtur seanca e vlerësimit të kundërshtimit të aktakuzës ndaj të pandehurit Ibër Alaj, Drejtor i Departamentit për Sport në Ministrinë e Kulturës Rinisë dhe Sporteve,  i cili akuzohet nga Prokuroria se ka keqpërdorur pozitën zyrtare, me rastin e punimeve të bëra në stadiumin “Përparim Thaçi” në Prizren.

Mbrojtësi i të pandehurit, avokati Osman Havolli, ka mbetur pranë kërkesës për hudhjen e aktakuzës të bërë me shkrim dhe të shtjelluar në shqyrtimin e dytë, duke theksuar se aktakuza ndaj të mbrojturit të tij është juridikisht e paqëndrueshme.

Prokurori i çështjes, Sefer Morina, ka mbetur pranë kundërshtimit të kërkesës së mbrojtjes, të bërë në shqyrtimin e dytë dhe ka kërkuar që të shkohet në shqyrtim kryesor, ku sipas tij do të vërtetohet fajësia e të akuzuarit.

Kryetari i trupit gjykues, Xhevdet Elshani ka refuzuar kërkesën e mbrojtjes për hudhje të aktakuzës, me arsye se aktakuza përmban prova, të cilat formojnë dyshimin e bazuar mirë se i akuzuari ka kryer veprën penale me të cilën ngarkohet.

Mbrojtja është tërhequr nga e drejta për ankesë ndaj vendimit të marrë, andaj gjykimi është caktuar të fillojë më 2 shtator 2016, në ora 10:00.

Më 18 mars 2016, Prokuroria Themelore në Prizren, ka ngritur aktakuzë ndaj të pandehurit Ibër Alaj, të cilin e akuzon se ka tejkaluar kompetencat dhe nuk ka përmbushur detyrën zyrtare, në atë mënyrë që i ka mundësuar kompanisë “Getoari” përfitim material, duke e ndryshuar projektin për renovimin e stadiumit “Përparim Thaçi” në Prizren, ku operatori ka pasur për detyrë që të ndërtojë mur rrethues, ndërsa në vend të murit është vendosur një rrethojë metalike.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë