Mungon sërish dekani i Fakultetit të Edukimit Fizik dhe Sportit i akuzuar për mosraportim të pasurisë, shtyhet gjykimi

Raporton: Donjeta AJVAZI

Prishtinë- Për shkak të mungesës së Musa Selimit, dekan i Fakultetit të Edukimit Fizik dhe Sportit i akuzuar për mosraportim të pasurisë, ka dështuar sërish të mbahet seanca fillestare ndaj tij, në rastin ku i njëjti po akuzohet se nuk ka bërë deklarimin e rregullt vjetor të pasurisë brenda afatit ligjor.

Gjykatësi i rastit Sabit Sadikaj konstatoi se në seancën e sotme nuk prezanton i akuzuari, për të cilin gjykata ka lëshuar urdhëresë për verifikim adrese dhe dorëzim ftese në seancën e kaluar, raporton “Betimi për Drejtësi”.

Gjykata do ta ftojë të njëjtin edhe një herë nga adresa e vendit të punës, pasi që nga e-maili i kthyer nga Policia e Kosovës ka rezultuar se adresa e tij ka ndryshuar.

Ndryshe, në seancën e sotme i pranishëm ishte prokurori Eset Rama.

Për shkak se nuk u plotësuan kushtet për mbajtjen e seancës së sotme, e njëjta u shty për 14 qershor 2022.

Ndryshe, sipas aktakuzës së ngritur nga Prokuroria Themelore në Prishtinë më 15 mars 2022, i pandehuri Musa Selimi në cilësinë e dekanit të Fakultetit Fizik dhe Sportit në Universitetin e Prishtinës “Hasan Prishtina”, funksion i cili kualifikohet në kuadër të zyrtarëve të lartë publik, me dashje ka vepruar kundër Ligjit për Deklarimin, Prejardhjen dhe Kontrollin e dhuratave për të gjithë personat zyrtarë.

Tutje sipas aktit akuzues i njëjti ka vepruar në kundërshtim me nenin 10 dhe nuk ka bërë deklarimin e rregullt vjetor të pasurisë brenda afatit ligjor në Agjencinë Kundër Korrupsionit në Prishtinë.

Me këtë, po akuzohet se ka kryer veprën penale “Mos raportim apo raportim i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare nga neni 430, par.1 i Kodit Penal, vepër kjo e dënueshme me gjobë ose me burgim deri në tre  vjet  /BetimipërDrejtësi

 Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë