Mungon prokurori, shtyhet gjykimi për uzurpim të lokaleve dhe vetëgjyqësi

Raporton: Albina KRASNIQI

Prishtinë – Në mungesë të prokurorit të enjten në Gjykatën Themelore në Prishtinë, është shtyrë gjykimi për uzurpim të lokaleve e vetëgjyqësi.

Në këtë rast, A.B. dhe B.G. akuzohen për veprën penale “Uzurpimi i  paligjshëm i pronës së paluajtshme”, kurse B.H. dhe S.G. akuzohen për veprën penal “Vetëgjyqësia”, raporton “Betimi për Drejtësi”.

Në lidhje me mungesën e prokurorit, gjyqtari i rastit Adnan Kamberi konstatoi se ka prova që i njëjti është ftuar në mënyrë të rregullt me procesverbalin e datës 7 prill 2022 mirëpo mungesën nuk e ka arsyetuar.

Ne këto rrethana, në mungesë të prokurorit është shtyrë seanca e paraparë për të enjten, ndërsa e radhës pritet të mbahet më 28 qershor.

Ndryshe, ndaj të akuzuarit S.G është veçuar procedura dhe ka përfunduar.

Prokuroria Themelore në Prishtinë më 4 dhjetor 2019, ka ngritur aktakuzë ndaj A.B. dhe B.G, të cilët i ngarkon me veprën penale “Uzurpimi i paligjshëm i pronës së paluajtshme”, kurse B.H dhe S.G. i akuzon për veprën penale “Vetëgjyqësia”.

Sipas aktakuzës, i akuzuari Arben më 10 prill 2018, në  Prishtinë, me veprën të pambështetur në ligj, pa të drejtë të shfrytëzimit dhe pa pëlqimin e pronarit Rr.B, vazhdon ta shfrytëzojë pronën e paluajtshme, lokalin nr. 52, në rrugën “Xhorxh Bush”, si pjesë e ndërtesës, me sipërfaqe 15 m2, për të cilin lokal bazuar në kontratën mbi shitblerjen të 19 marsit 2019, nga Drejtoria e Kadastrit në Prishtinë, të dëmtuarit Rr., i është lëshuar certifikata për të drejtën e pronësisë, me aktvendimin numër 011-463-2/724, të 27 marsit 2018.

Në dispozitivin e dytë të aktakuzës, i akuzuari B. ngarkohet se më 10 prill 2018, në Prishtinë, me veprim të pambështetur në ligj – pa të drejtë të shfrytëzimit dhe pa pëlqimin e pronarit I.D, vazhdon ta shfrytëzojë pronën e paluajtshme, lokalin nr. 54, në rrugën “Xhorxh Bush”, si pjesë e ndërtesës, me sipërfaqe 15 m2, për të cilin lokal bazuar në kontratën mbi shitblerjen të 19 marsit 2019, nga Drejtoria e Kadastrit  në Prishtinë, të dëmtuarit I., i është lëshuar certifikata për të drejtën e pronësisë, me aktvendimin numër 011-463-2/1063, të  13 prillit 2018.

Gjithmonë sipas aktakuzës, i akuzuari B. më 12 dhjetor 2018, në  Prishtinë, në lokalin nr.50, në rrugën “Xhorxh Bush”, ka ushtruar në mënyrë arbitrare të drejtën që ka menduar se i takon në vend se t’i drejtohet organit kompetent, në atë mënyrë që ka hyrë në lokal, pasi që e ka pyetur Arsimin, nipin e qiramarrësit të lokalit, B.K., se a ke sjellë qiranë për 12 muaj, për aq muaj sa nuk ia ka paguar qiranë, kur ka marrë përgjigjen se nuk do t’ia paguajnë, i akuzuari B. e ka paketuar mallin me kujdes, e ka lënë jashtë lokalit, e ka ndërruar cilindrin e bravës së derës dhe ka pritur në lokal deri sa ka ardhur policia.

Tutje, në dispozitivin e katërt, thuhet se i akuzuari S. më 12 dhjetor 2018, në Prishtinë, në lokalin nr.56, në rrugën “Xhorxh Bush”, ka ushtruar në mënyrë arbitrare të drejtën që ka menduar se i takon në vend se t’i drejtohet organit kompetent, në atë mënyrë që ka hyrë në lokal, pasi që qiramarrësi i lokalit, V.G, ka kërkuar që t’ia paguajnë qiranë, të cilën nuk e ka paguar për një vit, kur V. nuk e ka pranuar, i akuzuari S, ia ka marrë mallin nga lokali dhe ia ka vendosur jashtë lokalit, e ka ndërruar cilindrin e bravës së derës dhe ka pritur në lokal deri sa ka ardhur policia.

Me këto veprime, A.B. dhe B.G akuzohen për kryerjen e veprës penale “Uzurpimi i paligjshëm i pronës së paluajtshme”, nga neni 332, paragrafi 1 të Kodit Penal, vepër e cila dënohet me gjobë ose me burgim deri në dy vjet. Kurse, B.H. dhe S.G. akuzohen se kanë kryer veprën penale “Vetëgjyqësia” neni 418, paragrafi 1 të Kodit Penal, vepër e cila dënohet me gjobë ose me burgim deri në gjashtë  muaj.  /BetimipërDrejtësi 

Shënim: Personat e përmendur në ketë artikull konsiderohen të pafajshëm, përveç̧ nëse nga gjykata vërtetohet se janë fajtorë me vendim të formës së prerë.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë