Mungon prokurori dhe një i akuzuar, shtyhet seanca kundër kondukterëve të akuzuar për keqpërdorim të pozitës zyrtare

Raporton: Diana BERISHA

Prishtinë – Mos prezenca e prokurorit të çështjes Ilaz Beqiri dhe të akuzuarit Bekim Krasniqi, bëri që seanca e paraparë të mbahet të martën në Gjykatën Themelore në Prishtinë, të shtyhet për 15 shtator 2016. Përveç Krasniqit në këtë rast aktakuza e ngarkon edhe Hysen Ahmetin, Imer Canollin dhe Ilir Berishën për keqpërdorim të pozitës zyrtare.

Prezent në këtë gjykim të seancës fillestare ishin tre të akuzuarit e lartë përmendur dhe përfaqësuesi i të dëmtuarës “Trafiku Urban” Hafir Hamiti. Mirëpo si shkak i mungesës së prokurorit të çështjes dhe njërit prej të akuzuarve, gjyqtari Valon Kurtaj, tha se nuk janë plotësuar kushtet për mbajtjen e seancës.

Sipas Prokurorisë Themelore në Prishtinë, të akuzuarit Hysen Ahmeti, Imer Canolli, Ilir Berisha dhe Bekim Krasniqi, në cilësinë e personave zyrtarë – kondukter të Trafikut Urban kanë keqpërdorur detyrën e tyre zyrtare duke kopjuar kupona fiskal.

Aktakuza pretendon se i akuzuari Ahmeti ka keqpërdorur 666 kupona fiskal dhe ka përvetësuar shumën prej 266.40 euro. Tutje sipas prokurorisë i pandehuri Krasniqi ka përvetësuar shumën prej 45.60 euro, Canolli shumën prej 26.04 euro dhe i pandehuri Berisha shumën prej 25.06 euro. Me këtë rast të pandehurit në fjalë të dëmtuarës “Trafiku Urban”  në Prishtinë i kanë shkaktuar dëm material.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë