MUNGON I AKUZUARI, SHTYHET SEANCA E KORRUPSIONIT

Raporton: Valdet HAJDINI

Gjakovë – Mungesa e të akuzuarit Afrim Radoniqi, ish-Avokat Publik në Komunën e Gjakovës, u bë shkak për shtyrje të seancës në Gjykatën Themelore në Gjakovë.

Me gjithë faktin se i akuzuari Radoniqi kishte qenë i njoftuar nga seanca e kaluar për datën dhe kohën e mbajtjes së seancës, i njëjti nuk prezantoi në sallën e gjyqit, çka e shtyu gjyqtari Artan Sejrani të merr aktvendim për shtyrje të seancës. Seanca e radhës për këtë rast, u caktua për 14 korrik 2016.

I bashkakuzuar në këtë proces gjyqësor është edhe Xhevat Rraci, Drejtor në Drejtorinë për Gjeodezi, Kadastër dhe Pronë, në Komunën e Gjakovës, të cilët akuzohen për veprën penale “keqpërdorim i pozitës apo autoritetit zyrtar”.

Ky shqyrtim gjyqësor po zhvillohet në bazë të aktakuzës së Prokurorisë Themelore në Gjakovë, e cila i ngarkon Afrim Radoniqi dhe Xhevat Rraci se kanë shfrytëzuar autoritetin zyrtar, duke tejkaluar kompetencat e tyre, me qëllim të përfitimit të dobisë pasurore për vete dhe personit tjetër. Me këtë i kanë shkaktuar dëm Komunës së Gjakovës, në atë mënyrë që arrijnë marrëveshje për kompensim me pronarin e mëparshëm Pren Ibishaj, të cilit i njihet e drejta në shfrytëzimin e përhershëm të ngastrës kadastrale me sipërfaqe prej 345 metra katrorë, pa obligim të kompensimit në emër të shfrytëzimit dhe rregullimit të tokës ndërtimore, duke obliguar Komunën e Gjakovës të bëjë ndryshimet adekuate në librat kadastrale në emër të Prenk Ibishaj, duke i shkaktuar dëme materiale Komunës së Gjakovës.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë