Mungon i akuzuari, shtyhet gjykimi për ngasje në gjendje të dehur dhe shkaktim të aksidentit

Raporton: Albina KRASNIQI

Prishtinë – Në mungesë të të akuzuarit M.T, është shtyrë seanca e paraparë për të hënën në rastin ku i njëjti akuzohet se kishte drejtuar automjetin në gjendje të dehur dhe kishte goditur një automjet të parkuar.

Lidhur me mungesën e të akuzuarit, gjyqtari Ertan Sejfulla konstatoi se për të njëjtin është lëshuar urdhëresë për verifikim adrese, mirëpo nuk e kanë pranuar akoma njoftimin nga stacioni policor “Qendra” në Prishtinë.

Gjyqtari Sejfulla konstatoi se gjykata do të ndërmarrë veprimet procedurale kur të pranojë njoftimin nga ana e policisë, raporton “Betimi për Drejtësi”.

Në këto rrethana, në mungesë të kushteve ligjore për mbajtjen e seancës e njëjta është shtyrë në kohë të pacaktuar.

Ndryshe, e pranishme ishte prokurorja Fikrije Sylejmani.

Sipas aktakuzës së ngritur më 13 maj 2018, ekziston dyshimi i bazuar mirë se më 8 shkurt 2018, i akuzuari M.T, kishte drejtuar automjetin e tij nën ndikimin e alkoolit dhe si pasojë kishte shkaktuar aksident komunikacioni ku kishte goditur një makinë e cila ka qenë e parkuar.

Aktakuza thotë se me këtë rast, kishte pësuar lëndime trupore të përkohshme vet i akuzuari si dhe kishte shkaktuar dëme në të dy automjetet.

Me këtë, M.T po akuzohet se ka kryer veprën penale “ Ngasja në gjendje të paaftë apo të dehur” nga neni 379, par.1 të Kodit Penal. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë