Mungon i akuzuari Ervin Kastrati, shtyhet seanca për korrupsion

Raporton: Belkize LOSHAJ

Pejë – Shtyhet seanca e paraparë që të mbahet të hënën në Gjykatën Themelore në Pejë ndaj Ervin Kastratit, i akuzuar për veprat penale “ushtrim i ndikimit” dhe “falsifikim i dokumentit”.

Kryetari i trupit gjykues Sami Sharraxhiu, konstatoi se nuk ka kushte ligjore për mbajtjen e kësaj seance sepse nuk ishte prezentë i pandehuri edhe pse ishte njoftuar në mënyrë të rregullt.

Seanca e radhës u caktua për 10 tetor2016, në orën 10:00.

Sipas aktakuzës i pandehuri ka pranuar përfitime ne të holla për vete, që të ushtroj ndikim të pa drejtë mbi vendimmarrjen e personit zyrtar, në atë mënyrë që pasi i dëmtuari N.N. kishte nevojë për një trafo për separacionin e tij, i cili ishte djegur. Pasi kishte shkuar tek lokalet e KEDS-it, i dëmtuari e kishte takuar të pandehurin. Ky i fundit i kishte siguruar se do të ndikonte tek zyrtarët e tjerë dhe se brenda tri ditëve do t’a siguronte një gjë të tillë, por fillimisht ishte detyruar të paguante shumën prej 3.000 eurove. I dëmtuari ishte pajtuar dhe të hollat në fjalë ia kishte dorëzuar sipas marrëveshjes.

Gjithashtu, më 19 gusht 2014, si person zyrtar i KEDS-it, në shkresat zyrtare shënon të dhëna të rreme, ku të dëmtuarit i lëshon fatura kinse i ka shlyer borxhin në tërësi, ndërsa i dëmtuari më vonë pranon faturën me borxhin e përgjithshëm 7.554,45 euro.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë