MUNGON E AKUZUARA, SHTYHET SEANCA PËR LËNDIM TË LEHTË TRUPOR

Raporton: Verona KADRIU

Ferizaj – Për shkak të mungesës së të akuzuarës Magribe Bajrami e cila akuzohet për veprën penale “lëndim i lehtë trupor”, seanca e paraparë të mbahej në ora 13:30, të premten në Gjykatën Themelore në Ferizaj nuk u mbajt.

Gjyqtarja e çështjes, Hysnije Gashi konstatoi se e pandehura është ftuar në mënyrë të rregullt, mirëpo ka rezultuar se e njëjta gjendet jashtë shtetit. Andaj për shkak të mosplotësimit të kushteve ligjore shqyrtimi gjyqësor i caktuar nuk u mbajt, ndërsa seanca e radhës nuk u caktua për ndonjë datë konkrete.

E pandehura Magribe Bajrami me aktakuzën e ngritur nga Prokuroria Themelore në Ferizaj akuzohet për veprën penale “lëndim i lehtë trupor”, sepse më 26 shkurt 2014 në fshatin Zllatarë, Komuna Ferizaj, pas një mosmarrëveshje të më hershme me të dëmtuarën Fikrije, të njëjtën e kishte sulmuar me një mjet të fortë – dru në kokë, me ç’rast i ka shkaktuar lëndime të lehta trupore dhe atë plagë shqyese ndrydhëse në kokë me pasoja të përkohshme për shëndetin.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë