MBROJTJA KUNDËRSHTON EKSPERTIZËN FINANCIARE, GJYKATA URDHËRON PLOTËSIMIN E SAJ

Raporton: Adem KRASNIQI

Prishtinë – Ekspertiza e ekspertit financiar Riza Blakaj, nuk është pranuar nga mbrojtja e të akuzuarit Behxhet Salihu, në seancën e mbajtur të hënën në Gjykatën Themelore të Prishtinës. Behxhet Salihu akuzohet se gjatë vitit 2013, me qëllim të përfitimit të kundërligjshëm, në cilësinë e personit zyrtar si kontroller i zyrës postare në Kodrën e Trimave, kishte përvetësuar shumën prej 29.903.10 euro.

Në seancës e së hënës, prokurori Abdurrahim Islami, tha se në bazë të hetime të zhvilluara nga ana e prokurorisë dhe në bazë të deklaratave të dëshmitarëve, i akuzuari Salihu është fajtor për veprën penale “përvetësimi në detyrë” dhe i njëjti duhet të shpallet fajtor nga gjykata.

Mbrojtësi i të akuzuarit Behxhet Salihu, avokati Qerim Metaj e ka kundërshtuar prokurorin, duke thënë se nuk është dëgjuar dëshmitarja Saranda Ademi, koordiantore financiare në PTK edhe se ekspertiza financiare e kryer nga eksperti Riza Blakaj, është bërë vetëm duke u bazuar në raport të PTK-së, dhe duke mos u bazuar aspak në të dhëna qëndrore, gjë të cilën e ka pohuar edhe vet eksperti Blakaj në seancën e 19 janarit 2016.  “Klienti im për gjashtë vite është dëmtuar nga PTK-ja, përafërsisht 300 euro në muaj, duke u paguar si postier e në fakt punën e ka kryer si kontroller i zyrës postare. Gjithashtu klienti im e pranon fajin për shumën prej 16.340 eurove, të cilat i ka marrë për shërim të vajzës së tij në Turqi, dhe se është zotuar se pas dëmshpërblimit nga PTK-ja, për peridhën kohore sa nuk është paguar si kontroller i zyrës postare por si postier, do t’i kthente të gjitha”, tha avokati mbrojtës Qerim Metaj.

Tutje avokati Metaj, ka kërkuar nga trupi gjykues, që nëse eventualisht i akuzuari gjendet ndonjë vepër penale në këtë rast atëherë ajo nuk mund të jetë “përvetësimi në detyrë”, por “përvetësimi i paautorizuar i pasurisë”, vepër kjo e cila dënohet me gjobë ose me burgim deri në tre vjet.

Kryetari i trupit gjykues Faik Hoxha ka marr vendim që seanca e radhës të mbahet më 8 mars 2016, dhe e ka obliguar ekspertin financiar që të bëjë plotësimin e ekspertizës, duke pasur qasje në të dhënat qëndrore të PTK-së dhe në bazë të dokumenteve origjinale.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë