Mbrojtja kërkon t’i zëvendësohet paraburgimi me masa tjera alternative të akuzuarës se mashtroi 29 persona për rregullimin e vizave suedeze

Raporton: Doruntina MEHMETI

Mitrovicë- Mbrojtësi i të akuzuarës për mashtrim, Valbonë Peci, avokati Armend Krasniqi i propozoi gjykatës që masa e paraburgimit ndaj të mbrojturës së tij të zëvendësohet me ndonjë masë tjetër alternative të sigurimit të pranisë së të pandehurës në procedurë.

E akuzuara Peci ngarkohet se gjatë vitit 2020 dhe 2021, nga 29 persona ka pranuar 61 mijë e 600 euro, të cilëve iu kishte premtuar rregullimin e vizave suedeze.

Në seancën e së mërkurës, propozimin e avokatit Krasniqi nuk e kundërshtoi prokurori Sllobodan Bakiq, i cili i propozoi gjykatës që masën e paraburgimit ndaj të akuzuarës Peci ta zëvendësojë me masën e arrestit shtëpiak, raporton “Betimi për Drejtësi”.

Avokati Krasniqi këtë propozim e mbështeti në faktin se e mbrojtura e tij gjendet në paraburgim që nga nëntori i vitit të kaluar dhe se sipas tij kanë përfunduar kushtet ligjore për caktimin e kësaj mase, meqenëse rreth 99% e të dëmtuarve dhe dëshmitarëve janë dëgjuar.

Gjyqtari i rastit Rrahman Beqiri konstatoi se në lidhje me propozimet e avokatit dhe prokurorit do të vendosë jashtë seancës.

Ndryshe, në shqyrtimin e sotëm gjyqësor u dëgjuan të dëmtuarit-dëshmitarët Hazir Gashi, Zenun Rukolli, Neribane Syla, Gazmend Mehmeti, Lundrim Mehana dhe Valon Keqolli.

I dëmtuari Hazir Gashi duke u përgjigjur në pyetjet e prokurorit Bakiq, se si ishte njoftuar me të akuzuarën Peci dhe cilat kishin qenë kushtet e marrëveshjes së tyre për rregullimin e vizës në shtetin e Suedisë, deklaroi se ka tentuar të dalë në perëndim për shkak të gjendjes shëndetësore të fëmiut të tij.

Ai deklaroi se pasi ia kishte dorëzuar 1 mijë e 800 euro dhe disa dokumente personale, e akuzuara i kishte premtuar se viza do t’i bëhet për rreth tetë muaj.

I dëmtuari Haziri tha se nuk kanë kontaktuar më që nga dita kur i ka dorëzuar paratë dhe deri më tani nuk e ka marrë vizën dhe as paratë nuk i janë kthyer.

Duke u përgjigjur në pyetjet e avokatit Krasniqi, nëse kishte pasur marrëveshje me të akuzuarën Peci, që në rast se nuk i rregullohet viza t’ia kthejë paratë, i dëmtuari Gashi pohoi një gjë të tillë.

Kurse, i dëmtuari Zenun Rukolli në deklaratën e tij tha se me të akuzuarën është njoftuar përmes një kolegeje të tij, pasi kishte dëgjuar se e njëjta rregullon viza pune për në Suedi.

Ai shtoi se ia kishte paguar shumën prej 2 mijë e 700 euro të akuzuarës pasi ishte marrë vesh me të për kushtet e rregullimit të vizës.

Tutje, ai tha se më nuk e ka takuar të njëjtën derisa kishte kuptuar nga mediat se të akuzuarën e kishin arrestuar.

Gjyqtari Beqiri e pyeti të dëmtuarin Rukolli nëse kishte plotësuar ndonjë aplikacion për vizën apo nëse kishte marrë vërtetim pas pagesës së bërë.

“Jo, asnjë nga këto”, deklaroi i dëmtuari Rukolli.

Seanca vijoi me dëgjimin e të dëmtuarës Neribane Syla, e cila duke u përgjigjur në pyetjet e prokurorit deklaroi se me të akuzuarën Peci ishte njoftuar përmes një familjari të saj.

Ajo shtoi se ka lidhur marrëveshje me të akuzuarën për t’ua rregulluar vizat për në shtetin e Suedisë dy djemve të saj, duke ia dorëzuar të njëjtës shumën prej 3 mijë e 500 euro.

“Atë ditë kur ia kam dorëzuar paratë i kom thanë të lutem nëse mendon që nuk mundesh me i rregullu vizat tregom, mos t’i dorëzoj paratë fare”, shtoi tutje e dëmtuara Syla.

Ajo deklaroi se gjatë muajve pasi ia ka dhënë paratë ka biseduar me të akuzuarën ndërsa për herë të fundit e kishte takuar në fillim të shtatorit të vitit 2021.

“Na ka premtuar që nëse deri në dhjetor nuk rregullohen vizat, do të na i kthejë paratë”, tha e dëmtuara.

Duke u përgjigjur në pyetjet e avokatit Krasniqi, nëse e akuzuara Peci ia kthen paratë a do ta njoftonte gjykatën për këtë, e dëmtuara Syla deklaroi se natyrisht që po.

I dëmtuari tjetër Gazmend Mehmeti deklaroi se në këmbim të rregullimit të vizës në shtetin e Suedisë të akuzuarës ia ka dhënë 1 mijë euro.

Pasi ishin marrë vesh për kushtet e marrëveshjes, i dëmtuari Mehmeti deklaroi se disa herë ka kontaktuar me të akuzuarën në telefon, derisa nga rrjetet sociale ishte njoftuar se e njëjta është në paraburgim.

Ai shtoi se nuk kishte plotësuar asnjë aplikacion dhe e akuzuara nuk i kishte dhënë ndonjë vërtetim të pagesës së shumës së parave.

Duke u përgjigjur në pyetjet e avokatit Krasniqi, se në cilën periudhë është supozuar t’i rregullohet viza, i dëmtuari Mehmeti deklaroi se rreth muajit maj të këtij viti.

“A keni qenë në dijeni se Valbona nuk mundet me ua rregullu vizën se nga nëntori i vitit 2021 vazhdon të jetë në paraburgim”, e pyeti avokati Krasniqi.

I dëmtuari Mehmeti u përgjigj se është në dijeni për këtë fakt, ndërsa shtoi se edhe nëse lirohet nga paraburgimi dhe e përmbush marrëveshjen e rregullimit të vizës, të njëjtën nuk do ta pranonte.

Tutje, të dëmtuarit Lundrim Mehana dhe Valon Keqolli ndër të tjera deklaruan se ia kanë dhënë të akuzuarës shumën monetare prej 1 mijë 250 euro, respektivisht 2 mijë 400 euro, në këmbim të rregullimit të vizave në shtetin e Suedisë.

Të njëjtit deklaruan se kanë pasur marrëveshje me të akuzuarën për kthim të parave në rast se dështon rregullimi i vizave.

Por, ata shtuan se nuk e kanë marrë vizën dhe as paratë nuk u janë kthyer nga e akuzuara.

Për shkak se në shqyrtimin e sotëm gjyqësor nuk ishte i pranishëm i dëmtuari Ismajl Ismajli, gjyqtari Beqiri konstatoi shtyrjen e seancës për 8 korrik 2022.

Ndryshe, Prokuroria Themelore në Mitrovicë, më 11 shkurt 2022, ka ngritur aktakuzë ndaj Valbonë Pecit sepse ekziston dyshimi i bazuar mirë se në Mitrovicë në raste dhe periudha të ndryshme kohore ka sjellë në lajthitje disa persona, me fshehjen e fakteve e me qëllim që vetes t’i sjell përfitim pasuror, e vetëdijshme për veprën dhe për pasojat e të njëjtës.

Sipas aktakuzës, disa persona në dëm të pasurisë së vet të pandehurës i kanë dorëzuar shuma monetare në mënyrë që e njëjta t’ju sigurojë vizën e punës në Suedi, gjë që nuk e ka bërë në afatet e dakorduara, sepse për një veprim të tillë nuk ka pasur bazë, mundësi dhe as autorizim.

Kështu, aktakuza thotë se nga 29 persona në intervale të ndryshme kohore gjatë vitit 2020 e 2021, sipas kësaj baze ka pranuar shuma monetare, në shumë kumulative prej 61 mijë e 600 euro. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë