Mbrohet në heshtje i akuzuari i fundit në rastin e Mendersit me shokë

Raporton: Adem KRASNIQI

Prishtinë – Mbrojtësi i të akuzuarit për korrupsion Vahid Tahiri, avokati Admir Salihu tha se klienti i tij do të mbrohet në heshtje. “Mbesim prapa deklaratave të dhëna në seancat e mëhershme dhe tani skemi çka të shtojmë”.

Në seancën e së martës në Gjykatën Themelore në Prishtinë, përfundoi edhe marrja në pyetje  e të akuzuarit Menders Sinani. I njëjti, duke u përgjigjur në pyetjet e prokurorit të rastit Drew Engel, sqaroi përsëri rrethanat se si e kishte gjetur se ku ndodhej tani  i dëmtuari Bidajet Sylejmani, i cili në atë kohë ishte duke u akuzuar për trafikim me qenie njerëzore. Të njëjtin informacion Sinani i’a kishte përcjellë hetuesisë në Prishtinë.

Tutje, i akuzuari Sinani shpjegoi edhe një herë para trupit gjykues, për municionin që ishte gjetur në shtëpinë e tij gjatë bastisjes. Madje ai shtoi se aty kishin qenë vetëm disa plumba më shumë të revoles zyrtare, që i kishin mbetur nga qitjet që i kishin pasur në poligonin e policisë.

Kryetari i trupit gjykues Pitor Bojarchuk, tha se sot mbyllet zyrtarisht procedura e paraqitjes së provave dhe dëshmitarëve dhe seancën e fjalës përfundimtare e caktoi me pesë shtator 2016, në ora 9:30.

Prokuroria Speciale e Republikës së Kosovës më 27 dhjetor të vitit 2013 kishte ngritur aktakuzë kundër Menderes Sinanit, sipas të cilës në cilësi të Udhëheqësit të Njësisë për Anti-Trafikim në Ferizaj kishte kryer veprat penale “shpërdorim i pozitës zyrtare në bashkëkryerje”, “marrje e ryshfetit në bashkëkryerje”, “ushtrim i ndikimit në bashkëkryerje”, “shmangie nga pagesa e taksave të detyrueshme doganore në bashkëkryerje”, “dhënie e ndihmës kryesve, pas kryerjes së veprës penale”, “moslajmërim i veprave penale apo kryesve të tyre” dhe “ mbajtje në pronësi, kontroll ose posedim i paautorizuar i armëve”. Ndërkaq, sipas aktakuzës, i akuzuari tjetër Vahid Tahiri, si punëtor i ndërtimtarisë ka kryer veprat penale “shmangie nga pagesa e taksave të detyrueshme doganore në bashkëkryerje”, “ dhënie e ndihmës kryesve, pas kryerjes së veprës penale”, “moslajmërim i veprave penale apo kryesve të tyre” dhe “ mbajtje në pronësi, kontroll ose posedim i paautorizuar i armëve”. Në këtë proces gjyqësor janë të akuzuar edhe 5 persona tjerë: Besim Shabani, Sami Matoshi, Ramadan Ajvazi, Agron Matoshi dhe Burim Veseli.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë