MBAHET SHQYRTIMI GJYQËSOR NDAJ KRYETARIT TË KLLOKOTIT SREQKO SPASIQ

Raporton: Syzana REXHEPI

Gjilan- Në Gjykatën Themelore të Gjilanit të enjten është mbajtur shqyrtimi gjyqësor ndaj kryetarit të Komunës së Kllokotit, Sreqko Spasiq, i akuzuar për veprat penale ‘keqpërdorim i pozitës apo autoriteti zyrtar’dhe ‘cënim i të drejtave në punë’.

Gjatë kësaj seance palët dhanë fjalën e tyre hyrëse, gjatë së cilës prokurori i shteti Arben Kadriu tha se i akuzuari Sreqko Spasiq ka kryer veprat penale të përshkruara në aktakuzë. Sipas tij një gjë e tillë do të vërtetohet përmes ndëgjimit të dëshmitarëve të ftuar në këtë proces gjyqësor, por edhe pas adminstrimit të provave materiale.

Në anën tjetër, mbrojtësi i të pandehurit, avokati Avdylaziz Sadiku tha se aktakuza si e tillë nuk ka mbështetje në dispozita ligjore, prandaj dhe do të vërtetohet pafajësia e të akuzuarit.

Pas fjalës hyrëse shqyrtimi gjyqësor u ndërpre me arsyetimin se njëri nga antarët e trupit gjykues duhej të merr pjesë në një shqyrtim tjetër gjyqësor. Seanca e radhës u caktua për datë 13 qershor 2016 në ora 9:00.

Sipas aktakuzës, i akuzuari Sreqko Spasiq, prej 10 dhjetorit 2015, si Kryetari i Komunës të Kllokotit, ka keqpërdorur pozitën zyrtare apo autoritetin, në atë mënyrë që me  dashje ka shkelur të drejtën e punëtores Milica Mikroviq. Keqpërdorimi ka ardhur si pasojë e mos respektimit të vendimit të Këshillit të Pavarur Mbikëqyrës për Shërbimin Civil të Kosovës, të 10 dhjetorit 2015, për kthimin në  punë dhe detyrë të punës si menaxhere e Biblotekës së Komunës së Vitisë, edhe pse ka qenë i obliguar ta zbatojë një vendim të tillë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë