LIROHET NGA AKUZA AHMET SHEHU I AKUZUAR PËR KORRUPSION

Raporton: Verona KADRIU

Ferizaj – Ahmet Shehu i akuzuar për përvetësim gjatë detyrës në cilësinë e  arkëtarit në Bankën për Biznes (BpB), të hënën në Gjykatën Themelore në Ferizaj u lirua nga akuza. Gjithashtu ndaj të bashkëakuzuarit të Shehut, të pandehurit Milaim Bytyqit u morr aktgjykim refuzues pasi që prokurori Shukri Jashari hoqi dorë nga ndjekja penale për këtë të fundit.

Trupi Gjykues  i kryesuar nga gjyqtari Agim Maliqi, shpalli aktgjykimin ndaj të pandehurit Ahmet Shehu  i cili është liruar nga akuza me që nuk është provuar se i njëjti ka kryer veprën penale për të cilën akuzohej “përvetësimi gjatë ushtrimit të detyrës” nga neni 340 paragrafi 3 të Kodit Penal të Kosovës.

Ndërsa në bazë të nenit 363 paragrafi 1 të KPPRK-së, është refuzuar akuza ndaj të pandehurit Milaim Bytyqi  me që prokurori i shtetit  Shukri Jashari është tërhequr nga dispozitivi I akuzës sa i përket këtij të fundit për veprën penale “Përvetësimi gjatë ushtrimit të detyrës”  nga neni 340  paragrafi 3 të Kodit Penal të Kosovës.

Kurse i dëmtuari në këtë çështje, Haki Mazreku për kompensimin e dëmit të shkaktuar u udhëzua në kontest civil.

Sipas aktakuzës së ngritur nga Prokuroria Themelore në Ferizaj Ahmet Shehu dhe Milaim Bytyqi akuzohen se në bashkëryerje gjatë periudhës 2003-2004, në Han të Elezit, i pandehuri i parë në cilësinë e arkëtarit në BpB, në Han të Elezi, si dhe i pandehuri i dytë Milaim Bytyqi në cilësinë e personit përgjegjës në agjencionin “Iliria Shped” në Han të Elezit,me qëllim të përfitimit të kundërligjshëm të dobisë pasurore për vete, kanë përvetësuar paratë e besuara në bazë të detyrës zyrtare të tyre, dhe atë Ahmet Shehu me rastin e deponimit të parave nga ana e të dëmtuarit Haki Mazreku për pagesën e DUD-ve, të njejtat pagesa nuk i ka evidentuar për shlyerjen  e detyrimeve doganore për importimin e mallit, kurse i pandehuri Milaim Bytyqi ka bërë tërheqjen e parave me qëllim të pagesës së DUD-ve, por këto para nuk i kanë shfrytëzuar për atë qëllim, por pagesa është bërë nga kredia suazore e të dëmtuarit,me ç’rast i kishin shkaktuar dëm të dëmtuarit në vlerë prej 74,089.73 euro.

 

 

 

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë