KREDITIMI RURAL I KOSOVËS NUK I BASHKANGJITENT NDJEKJES PENALE, NË GJYKIMIN KUNDËR ISH-LLOGARITARIT

Raporton: Valdet HAJDINI

Pejë – Alban Gërguri, përfaqësues i autorizuar i palës së dëmtuar-Kreditimi Rural i Kosovës (KRK), deklaroj se nuk i bashkëngjitet ndjekjes penale kundër Rasim Marmulaku, i akuzuar për veprën penale ‘përvetësim gjatë ushtrimit të detyrës’. Këtë deklaratë Gërguri e bëri të enjten, para trupit gjykues të kryesuar nga gjyqtarja Lumturije Muhaxheri, duke shtuar se klienti e ka mbyllur kredinë dhe KRK nuk është e dëmtuar në këtë rast.

“Nga faturat e pagesës së kredisë rezulton që pagesat janë kryer me rregull, ndërsa shuma e mbetur prej 1.460,55 euro është mbuluar nga shitja e aksioneve të Shoqatës”, tha dëshmitari Gërguri.

Në mbrojtjes e tij, i akuzuari Rasim Marmullaku deklaroj se i gjithë ky rast ka mundur të jetë si pasojë e një gabimi teknik të bërë gjatë punës së përditshme.

Duke u përgjigjur në pyetjen e prokurores Sahide Gashi, se çfarë ka ndodhur me shumën e parave prej 1.466,55 euro, i akuzuari Marmullaku tha se “meqë kishte shumë kredi, ka mundësi që me ato mjete janë mbuluar kreditë e personave tjerë, por e sigurt është që as klientët e as KRK nuk është e dëmtuar në këtë rast”.

Seanca e radhës për këtë rast gjyqësor u caktua për 26 korrik 2016, me fillim në ora 9.00, ku palët do të japin fjalët përfundimtare.

Ndryshe, Prokuroria Themelore në Pejë e akuzon Rasim Marmullakun, se në cilësi të personit përgjegjës në Shoqatën “Perspektiva Fshatare”, në fshatin Jashanicë, KK Klinë, kishte përvetësuar shumën e të hollave prej 1.359,55 euro. Sipas prokurorisë, këto mjete i kishte marrë prej Fazli Berishës në emër të mbylljes së kredisë, ndërsa të njëjtat nuk i kishte dorëzuar në KRK, përmes llogarisë bankare në NLB Bank. Prokuroria pretendon se kjo ngjarje ka ndodhur në dhjetor 2011.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë