KGJK miraton Rregulloren për Vlerësimin e Performancës së Gjykatësve

Raporton: Arbelina DEDUSHAJ

Prishtinë – Në mbledhjen e 161-të të Këshillit Gjyqësor të Kosovës (KGJK) u miratua Rregullorja për Vlerësimin e Gjykatësve bashkë me ndryshimet dhe propozimet e anëtarëve të Këshillit. Kjo rregullore u miratua me 8 vota për, anëtari Nebojsha Boriçiq votoi kundër, ndërsa apstenuan anëtarët Muhamet Rexha dhe Nenad Laziq.

Ndër të tjera anëtari i Këshillit, Armend Berisha potencoi se Komisioni për Vlerësimin e Gjykatësve do të jetë i përbërë nga 13 anëtarë, 6 anëtarë nga Gjykata Supreme, ku njëri nga ta do të jetë edhe Kryesuesi i Komisionit, 4 nga Gjykata e Apelit dhe 3 anëtarë nga Gjykatat Themelore.

KGJK po ashtu morri vendim që ushtrues detyre në Gjykatën Themelore në Pejë të jetë Lumturije Muhaxheri, të cilën detyrë e njëjta e ka ushtruar deri në ditën e mbajtjes së kësaj mbledhje. Pozita e ushtueses së detyres Muhaxherin do ta obligojë deri në momentin e zgjedhjes së kryetarit të së njëjtës gjykatë përmes konkursit publik.

Po ashtu për plotësimin e komisionit për rekrutimin e gjyqtarëve u votua njëzëri që anëtare të jetë Hajrije Shala.

Në këtë mbledhje u miratuan unanimisht ekstraktet e procesverbaleve nga mbledhja 153, 154, 155 dhe 156 të KGJK-së, kërkesa e Sekretariatit të KGJK-së për shpërndarjen e 16 pozitave dhe pika shtesë që ka të bëjë me ndryshimin dhe plotësimin e Rregullores për Rekrutimin dhe Emërimin e Gjykatësve.

Pikat e rendit të ditës që kanë të bëjnë me shqyrtimin e kërkesës së SKGJK-së në lidhje me emërimin e disa pozitave dhe shqyrtimin e strukturës së brendshme të këtij Sekretariatit u shtynë, pasi nuk kishte mundur që të sigurohet materiali nga ana e tyre, përkatësisht nga vet Sekretariati.

Ndërsa si pikë e mbyllur e rendit të ditës ishte shqyrtimi i një shkrese nga EULEX-i. Lidhur me këtë pikë kryesuesi i KGJK-së,  Nehat Idrizi njoftoi se kjo pikë do të shtyhet, pasi përfaqësuesi i EULEX-it nuk ishte i pranishëm në mbledhje.

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë