Këshilltari i Ambasadës së Kosovës në Vjenë dënohet me 600 euro gjobë për mosraportim të pasurisë

Raporton: Blerim JAKUPI

Kamenicë – Isa Kosumi, këshilltar në Ambasadën e Republikës së Kosovës në Vjenë të Austrisë, është dënuar me 600 euro gjobë për mosraportim të pasurisë.

Aktgjykimi ndaj Kosumit u shpall të mërkurën nga gjykatësja e Gjykatës Themelore në Gjilan, dega në Kameincë, Valbonë Dërvodeli, raporton “Betimi për Drejtësi”.

Ndryshe, i akuzuari Kosumi paraprakisht me avokatin e tij, Selmon Sadiku, më 30 dhjetor 2021, kishin arritur marrëveshje me Prokurorinë Themelore në Gjilan për pranimin e fajësisë, e cila marrëveshje është aprovuar nga gjykata në fjalë.

Prokuroria Themelore në Gjilan, më 15 korrik 2019 ka ngritur aktakuzë ndaj Isa Kosumit, me arsyetimin se ai nga 1 deri më 31 mars 2019, në kohë të papërcaktuar, në cilësinë e këshilltarit në Ambasadën e Republikës së Kosovës në Vjenë të Austrisë, edhe pse ka qenë i detyruar ta bëjë deklarimin e rregullt vjetor të pasurisë sipas Ligjit nr. 04/L-050 Ligji për deklarimin, prejardhjen dhe kontrollin e pasurisë, i njëjti nuk e ka bërë një gjë të tillë brenda afatit ligjor, për vitin paraprak të periudhës kohore nga 1 janari deri më 31 dhjetor 2018.

Më këtë, ai akuzohej se ka kryer veprën penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose detyrimeve financiare” nga neni 430, paragrafi 1 të Kodit Penal të Republikës së Kosovës (KPRK), vepër kjo e dënueshme me gjobë ose burgim deri në 3 vjet.

Vepra penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, është vepër e cila hyn në kuadër të kapitullit “Korrupsioni zyrtar dhe veprat penale kundër detyrës zyrtare” të Kodit Penal të Republikës së Kosovës. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë