Këshilli i Fakultetit të FSHMN-së aprovon raportet e komisioneve vlerësueses për publikim në Buletin

Raporton: Ermira HOXHA

Prishtinë – Këshilli i Fakultetit të Shkencave Matematikore Natyrore (FSHMN), në mbledhjen e mbajtur të martën, ka aprovuar të gjitha pikat e rendit të ditës, ndër to ka aprovuar edhe raportet e komisioneve vlerësuese për publikim në Buletin.

Kryesuesi i Këshillit, dekani i FSHMN-së, Idriz Vehapi ka prezantuar gjithsej pesë pikat e rendit të ditës, të cilat u aprovuan me të gjitha votat e anëtarëve të këtij këshilli, raporton “Betimi për Drejtësi”.

Fillimisht, dekani Vehapi ka njoftuar se faza në të cilën gjenden është shqyrtimi i raporteve, nëse të njëjtat janë të shkruara konform rregullores për krijim, avancim të personelit akademik.

“Mua më lejoni vetëm të ju përkujtoj se fazën në të cilën jemi në shqyrtimin e konkursit, përkatësisht pikave që janë në konkurs/pozita, neni 14, procedura pas dorëzimit të raportit nga komisioni vlerësueses, do të thotë tani jemi në këtë fazë”, tha Vehapi.

Sipas tij, pika e parë e nenit 14 thotë se “Këshilli i Fakultetit pas dorëzimit të raportit nga komisioni vlerësueses është i obliguar në mbledhjen e radhës jo më shumë se 7 ditë të shqyrtojë raportin”, duke shtuar se janë në afatin optimal për fillimin e shqyrtimit të raporteve nëse të njëjtat janë shkruar konform rregullores.

Në këtë mbledhje, u bë edhe shqyrtimi i raporteve të komisioneve vlerësueses për publikim në Buletin, lidhur me konkursin për emërimin, riemërimin ose avancimin e personelit akademik në fakultetet e Universitetit të Prishtinës “Hasan Prishtina”, konkretisht në Fakultetin e Shkencave Matematikore Natyrore dhe aprovimi i propozimeve të departamenteve lidhur me formimin e komisioneve vlerësuese për pozita e shpallura në konkursin për angazhim të bashkëpunëtorëve të jashtëm për ligjërata dhe ushtrime, të cilat u aprovuan me votat e të gjithë anëtarëve të këtij Këshilli.

Derisa diskutohej shqyrtimi i raporteve të komisioneve vlerësueses, një reagim pati profesoresha Arleta Rifati-Nixha, e cila tha se dëshiron të ndalet tek referati numër 27, pasi që sipas saj prej fillimit të komisionit që është përcaktuar, nuk është respektuar neni 12 përkatësisht paragrafi 8 i Rregullores nr.836 të 27 prillit 2022.

Sipas profesoreshës Rifati-Nixha në këtë rregullore potencohet shumë mirë që komisioni duhet të jetë i plotësuar nga dy anëtarë të fushës së ngushtë që për fat të keq ajo tha se nuk është bërë një zgjedhje adekuate.

“Sa i përket referatit numër 27, i kisha disa të themi vërejtje, nuk është e potencuar hiq pika 5 kriteret e Statutit të UP-së dhe kushtet e konkursit. Është tabela 5.1 për mësimdhënës që nuk figuron fare as për kandidatin që është propozuar, nuk e di a ju ka ra në sy d.m.th. nuk figuron, tek kandidatët e tjerë është kjo tabelë, këtu nuk figuron fare. E dyta është tek tabela përmbledhëse e kontributit të kandidatit, temat që janë potencuar janë të studimeve bachelor, kurse në tabelë duhet të potencohen të studimeve master dhe të doktoratës”, ka thanë tutje Rifati-Nixha.

Tutje, e njëjta ka theksuar se sa i përket fund-propozimit që e japin komisioni potencohet se kandidatja Miribane Dërmaku është rizgjedh asistente në vitin 2020, por sipas saj nuk potencohet në cilin drejtim as lëndët që i mban e i ligjëron dhe nuk potencohet në cilin drejtim i ka punimet shkencore, ndërsa në fund potencohet se kandidatja i ka punimet master dhe doktoratës në fushën e Kimisë së Mjedisit dhe Analitike.

“Si mundet anëtari i njëjtë i komisionit derisa sa e shkruan referatin për asistente e potencon që Miribane Dërmaku është asistente e Kimisë Organike, për shkak se ajo ka vendimet të vitit 2011-2016-2020 në fushën e organikës dhe biokimisë , profesori i njëjtë tash në këtë referatin tjetër e potencon që ajo nuk është e fushës?” pyeti ajo.

Sipas saj, atëherë duhet të merret vendim të anulohen të gjitha vendimet që i ka pasur deri më tani.

“Ose mos me marrë këta që osht e potencume për shkak se kandidatja temën e ka në fushën e organikës dhe biokimisë dhe të gjitha punimet shkencore i ka në këtë fushë” shtoi tutje Rifati-Nixha.

Lidhur me këtë, shefja e Departamentit të Fakultetit të Kimisë, Sevdije Govori iu drejtua profesoreshës Rifati-Nixha e cila tha se në këtë takim janë mbledhur për të analizuar vetëm anën e teknike.

“Në moment kur na e potencojmë mendimin e komisionit recensues ai kalon në çështje tjetër jo teknike më, na sot nuk e kemi drejtë me analizua mendimin e komisionit recensues vetëm anën teknike, daljen në Buletin”, tha Govori.

Lidhur me këtë, një sqarim e ka dhënë edhe anëtari i Këshillit të Fakultetit, prodekani Avni Berisha, i cili tha këto materiale i kalojnë pjesës administrative dhe të njëjtit për çfarëdo problemi të natyrës teknike i rikthejnë referatet.

“Vetëm për sqarim prej konkursit të kaluar këto materiale i kalojnë pjesës administrative dhe ata për çdo problem, po quaj të natyrës teknike i rikthejnë referatet kështu ka ndodh në konkursin e kaluar”, tha Berisha.

Në vijim këto janë pikat e rendit të ditës të cilat u aprovuan nga Këshilli i Fakultetit të FSHMN-së:

  1. Aprovimi i ekstraktit nga mbledhja e Këshillit të Fakultetit, të mbajtur më 26 maj 2022
  2. Shqyrtimi i raporteve të komisioneve vlerësueses për publikim në Buletin, lidhur me konkursin për emërimin, riemërimin ose avancimin e personelit akademik në Fakultetet e Universitetit të Prishtinës “Hasan Prishtina”, konkretisht në fakultetin e Shkencave Matematikore Natyrore, konkursi nr.967, datë 4 maj 2022
  3. Aprovimi i propozimeve të departamenteve lidhur me formimin e komisioneve vlerësuese për pozita e shpallura në konkursin për angazhim të bashkëpunëtorëve të jashtëm për ligjërata dhe ushtrime, konkursi 1/217 datë 1 qershor 2022
  4. Shqyrtimi i kërkesave të stafit akademik
  5. Të ndryshme.

Me aprovimin e këtyre pikave, ka përfunduar edhe kjo mbledhje. /BetimipërDrejtësi

Shënim: Kjo mbledhje e Këshillit të Fakultetit të FSHMN-së është monitoruar nga “Betimi për Drejtësi”.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë