Kërkohet institucionalizim adekuat për vlerësimin e legjislacionit dhe masave administrative anti-korrupsion

Raporton: “Betimi për Drejtësi”

Prishtinë- Në kuadër të projektit “Evropa Juglindore – Së Bashku Kundër Korrupsionit”, Njësia e Shoqërisë Civile e Zyrës së Kombeve të Bashkuara për Droga dhe Krim (UNODC), me përkrahjen e Bashkëpunimit Austriak për Zhvillim, të premten është mbajtur konferencë për media ku është publikuar raporti “Nevoja për institucionalizimin e vlerësimit anti-korrupsion në Kosovë (Neni 5.3. i UNCAC)”.

Në këtë konferencë, u kërkua institucionalizimi adekuat për vlerësimin e legjislacionit dhe masave administrative anti-korrupsion, raporton “Betimi për Drejtësi”.

Neni 5.3. i Konventës së Kombeve të Bashkuara Kundër Korrupsion (UNCAC) ka përcaktuar obligimin e shteteve palë për të kryer vlerësimin periodik të përshtatshmërisë së legjislacionit dhe masave administrative anti-korrupsion. Ndonëse nuk është shtet anëtare e UNCAC, në përpjekjet e saj anti-korrupsion, Kosova ka treguar vazhdimisht përpjekje për zbatimin e standardeve të kësaj Konvente.

Gzim Shala, autor i këtij raporti, gjatë konferencës për media, ka thënë se në Kosovë mungon institucionalizimi adekuat i këtij lloj vlerësimi.

“Kosova deri më tani ka treguar përpjekje për zbatimin e UNCAC. Po ashtu, institucionet kanë treguar përpjekje për ndërtimin e procedurave për vlerësimin e mëpastajmë të legjislacionit, siç njihet ndryshe vlerësimi ex-post. Por, në kuptim të fushës së korrupsionit dhe kërkesave të UNCAC, ky raport ka gjetur se korniza aktuale për vlerësimin e legjislacionit dhe masave administrative anti-korrupsion, nuk është adekuate. Kjo pasi dokumentet aktuale që e trajtojnë këtë çështje nuk ndërtojnë institucione dhe procedura adekuate për të bërë vlerësimin periodik të përshtatshmërisë së legjislacionit dhe masave administrative anti-korrupsion. Përkatësisht, këto dokumente nuk e trajtojnë korrupsionin në mënyrë të veçantë dhe lënë jashtë vlerësimit masat administrative anti-korrupsion”, ka thënë Shala.

Tutje, Shala ka thënë se deri më tani, në Kosovë janë ndryshuar vazhdimisht ligjet, por se ndryshimi i këtyre ligjeve është bërë pa një vlerësim profesional të përshtatshmërisë së ligjeve.

Ai ka shtuar adresimi i standardit të UNCAC për vlerësim periodik të përshtatshmërisë së legjislacionit dhe masave administrative anti-korrupsion duhet të bëhet me ligj.

“Në mënyrë që të kemi vlerësim adekuat dhe periodik të legjislacionit dhe masave administrative anti-korrupsion, Ministria e Drejtësisë duhet që këtë çështje ta adresojë me ligj. Kështu, kjo Ministri duhet të themelojë grupin punues për hartimin koncept-dokumentit mbi modalitetet e institucionalizimit të vlerësimit periodik të përshtatshmërisë së legjislacionit dhe masave administrative anti-korrupsion. Në këtë raport, janë të përfshira modele të ndryshme se si në Kosovë mund të institucionalizohet vlerësimi periodik i legjislacionit dhe masave administrative anti-korrupsion”, ka përfunduar Shala.

Raportin e plotë mund ta gjeni KËTU /BetimipërDrejtësi

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë