Ish-drejtori i Spitalit  Regjional  të  Gjilanit  deklarohet i pafajshëm për keqpërdorim të detyrës

Raporton: Syzana REXHEPI

Gjilan – I akuzuari Avdylatif  Latifi ish-drejtor i Spitalit Regjional të Gjilanit u deklarua i pafajshëm për veprën penale ‘keqpërdorim i pozitës apo autoriteti zyrtar’ në seancën fillestare të mbajtur të enjten në Gjykatën Themelore në Gjilan.

Sipas aktakuzës së Prokurorisë Themelore në Gjilan, i pandehuri Avdylatif Latifi, si-drejtor ekzekutiv në Spitalin e Përgjithshëm në Gjilan, duke shfrytëzuar detyrën apo autoritetin zyrtar, akuzohet se me dashje nuk i ka kryer detyrat e përcaktuara me ligj, ashtu që nga fillimi i vitit 2012 e gjerë në vitin 2014 në vazhdimësi pa shpallje të tenderit apo të shpalljes publike, ka lidhur kontratë mbi qira me qiramarrësin Ilir Selimin. Ky i fundit si pronar i objektit Kantina “Vitamina”, kishte nënshkruar kontrata të qirasë më këtë spital çdo katër muaj për të marrë me qira pronën e spitalit në sipërfaqe prej 40 metra katror me pagesë mujore prej 500 eurove. Këtu ishin përfshirë edhe shpenzimet e ujit dhe të rrymës që do t’i paguante Spitali Regjional deri në lartësinë mujore prej 100 eurove. Sipas Prokurorisë, qiramarrësit i ishte lejuar shfrytëzimi i pronës edhe pas skadimit të kontratës së fundit dhe qiramarrësi edhe gjatë vitit 2015 e kishte shfrytëzuar pronën pa kontratë. Kjo çështje ishte ngritur nga Auditori i Përgjithshëm, i cili kishte konstatuar se dhënia me qira ishte bërë në mënyrë të kundërligjshme, meqë nuk ishin aplikuar procedura të tenderimit.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë