ISH-AVOKATI PUBLIK I PRIZRENIT DËNOHET ME KUSHT NJË VIT BURGIM

Raporton: Lutfi MORINA

Prizren – Eqrem Muçaj, ish-avokat publik i Komunës së Prizrenit, i akuzuar për keqpërdorim të detyrës zyrtare me rastin e një barazimi gjyqësor në vitin 2007, të martën në Gjykatën Themelore në Prizren, është dënuar me kusht prej një viti burgim, i cili dënim nuk do të ekzekutohet, nëse në afatin e verifikimit prej dy vitesh, i njëjti nuk kryen vepër të re penale.

Kryetari i trupit gjykues, Xheladin Osmani, ka njoftuar se në bazë të provave materiale në shkresat e lëndës dhe dëshmisë së dëshmitarëve në procedurën e provave, trupi gjykues ka marrë aktgjykim, me të cilin i akuzuari shpallet fajtor.

Prokuroria Themelore në Prizren, në vitin 2010, ka ngritur aktakuzë, ndaj tani ish-avokatit publik të Komunës së Prizrenit, Eqrem Muçaj, për shpërdorim të detyrës apo autorizimit zyrtar, për shkak se më 7 dhjetor 2007, në Gjykatën Komunale në Prizren, në lëndën e propozuar nga familja Vehapi për kthimin e pronës së eksproprijuar, i akuzuari duke vepruar si përfaqësuar i Komunës së Prizrenit si kundër propozues, i tejkalon autorizimet, duke e arritur barazimin gjyqësor dhe duke ua kthyer paluajtshmërinë në sipërfaqe prej 1.36.14 ha., që sipas organit të akuzës një ari ka vlerën e 15.000 eurove, me këtë rast i ka shkaktuar dëm material Komunës së Prizrenit dhe Agim Kalinuros, i cili e kishte pronën në shfrytëzim, me vendim të ligjshëm.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë