I dënuari për korrupsion, Qazim Rrahmani jep dorëheqje nga pozita e zëvendësministrit të Financave

qazim (1)
Author

Raporton: “Betimi për Drejtësi”

Prill 6, 2021

Prishtinë – Qazim Rrahmani, i cili nga kryeministri i Republikës së Kosovës, Albin Kurti, me 2 prill të këtij viti është emëruar në pozitën e zëvendësministrit të Ministrisë së Financave, Punës dhe Transfereve, ka dhënë dorëheqje nga ky post.

Rrahmani, i dënuar për keqpërdorime me paratë e buxhetit të Kosovës, të martën, përmes një njoftimi në rrjetin social “Facebook”, ka njoftuar se ka kërkuar nga kryeministri Kurti lirimin nga detyra e lartpërmendur, raporton “Betimi për Drejtësi”.

Ndryshe, edhe njoftimin se ishte emëruar në pozitë qeveritare nga kryeministri Kurti, Rrahmani e kishte bërë të ditur përmes një postimi në “Facebook”, raporton “Betimi për Drejtësi”.

“Të nderuar qytetarë, sot kam pranuar vendimin nga Kryeministêri z.Albin Kurti dhe zv.Kryeministêrja znj. Emilija Redžepi, të cilit më emruan zv.Ministër në Ministrin e Financave, Punës dhe Transfereve… Me nder dhe përgjegjësi do të vazhdoj kontributin për vendin dhe qytetarët e Kosovës, respektivisht për komunitetin tim”, kishte shkruar Rrahmani në postimin e tij.

Mirëpo, Rrahmani në tetorin e vitit 2018 është dënuar nga Gjykata Themelore në Prishtinë, pasi ishte vërtetuar se gjatë kohës në të cilën ka ushtruar pozitën e zëvendësministrit në Ministrinë e Punës dhe Mirëqenies Sociale, duke e shfrytëzuar këtë pozitë, ka tejkaluar kompetencat e tij ligjore në mënyrë që t’i sjellë vetës përfitim pasuror.

Prokuroria pretendonte se Rrahmani, gjatë periudhës qershor 2015 e deri në janar 2016, nga kartela bankare zyrtare, e destinuar për udhëtime jashtë vendit, ka nxjerrë shumën prej 12.363.40 euro, pa pasur aprovim për udhëtime zyrtare.

Për këtë vepër ai ishte dënuar gjashtë muaj burgim, mirëpo, me pëlqimin të tij, ky dënim me burg i ishte zëvendësuar pastaj në dënim me gjobë në lartësi prej 3,000 euro, për të cilin vendim ai nuk kishte bërë fare ankesë.

Ai po ashtu ishte obliguar që t’ia kthejë Ministrisë së Punës dhe Mirëqenies Sociale (MPMS) edhe shumën prej 4,858.89 euro, ngase më parë ia kishte kthyer kësaj ministrie shumën prej 7.504.51euro.

Mirëpo Rrahmni, që vjen nga Partia e Ashkalinjëve për Integrim (PAI), ishte emëruar në pozitën e zëvendësministrit të Kulturës, Rinisë dhe Sportit edhe në Qeverinë e udhëhequr nga ish-Kryeministri Avdullah Hoti, raporton “Betimi për Drejtësi”.

Ndryshe, Rrahmani në vazhdimësi ka mbajtur pozita në Qeveritë e Kosovës. Në Qeverinë e ish-kryeministrit Ramush Haradinaj, Rrahmani, kishte qenë zëvendësministër në Ministrinë për Komunitete dhe Kthim.

Në bazë të aktakuzës së Prokurorisë Themelore në Prishtinë, Qazim Rrahmani, akuzohej se gjatë kohës në të cilën ka ushtruar pozitën e zëvendësministrit në Ministrinë e Punës dhe Mirëqenies Sociale, duke e shfrytëzuar këtë pozitë ka tejkaluar kompetencat e tij ligjore në mënyrë që t’i sjellë vetës përfitim pasuror.

Prokuroria pretendonte se Rrahmani, gjatë periudhës qershor 2015 e deri në janar 2016, nga kartela bankare zyrtare, e destinuar për udhëtime jashtë vendit, ka nxjerrë shumën prej 12.363.40 euro, pa pasur aprovim për udhëtime zyrtare.

Gjithnjë sipas aktakuzës, nga shuma e përgjithshme e cila ishte tërhequr, MPMS-së, Rrahmani ia ka kthyer 7.504.51 euro, ndërsa dëmi i mbetur ndaj MPMS-së arrinte vlerën prej 4,858.89 euro. /BetimipërDrejtësi