I akuzuari se vodhi targën e veturës refuzoi thirrjen e gjykatës, kërkohet të dërgohet me forcë në seancë

Raporton: Arbenita RRAHMANI

Gjykata Themelore e Prishtinës, dega në Lipjan, do të kërkojë praninë e të akzuzuarit për vjedhjen e targës së veturës, D.H, në seancë pasi i njëjti ka refuzuar ftesën e organeve të drejtësisë.

Gjykatësi Selman Salihi për të akuzuarin D.H ka thënë se gjykata e ka ftuar me thirrje të rregullt, thirrje të cilën ia ka dërguar përmes shërbimit të  postës, mirëpo i njëjti ka refuzuar.

“Në bazë të informacionit të shërbimit të postes, i njëjti ka refuzuar ftesën” tha Salihi.

Andaj në mungesë të kushteve ligjore për mbajtjen e kësaj seance, e radhës u caktua më 12 korrik 2022, në ora 9:45.

Ndaj të pandehurit gjykata do të lëshojë urdhëresë për sjellje të detyrueshme në gjykatë përmes Policisë.

Ndryshe, e pranishëm në seancën e sotshme ishte prokurori Ali Ajdini.

Gjykata Themelore në Prishtinë ka ngritur aktakuzë 17 shtator 2019ë ndaj të akuzuarit D.H të cilin po e akuzon me veprën penale “Vjedhja” nga neni 325 paragrafi 1 të KPRK-së

Sipas aktakuzës, më 26 dhjetor 2018 rreth orës 17:30 në fshatin Bujan, saktësisht në rrugën magjistrale Lipjan – Shtime në restaurantin “Villa Pauna” i pandehuri me qëllim që vetit t’i sjellë përfitim pasuror të kundërligjshëm me përvetësimin e sendeve të huaja të luajtshme në parkingun e restaurantit e kishte vjedhë targën e pasme të veturës pronë e të dëmtuarit V.B e pastaj ishte larguar nga vendi dhe kishte shkuar në drejtim të panjohur.

Tutje, sipas aktakuzës, me ç’rast të dëmtuarit i kishte shkaktuar dëm material.  /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë