I akuzuari për përvetësim në detyrë, nuk e pranon fajësinë, kërkon avokat mbrojtës

Raporton: Lutfi MORINA

Prizren – I akuzuari Besnik Huqaj ka mohuar fajësinë për veprën penale të përvetësimit në detyrë dhe ka kërkuar që t’i  caktohet një mbrojtës sipas detyrës zyrtare për seancat e radhës.

Huqaj është paraqitur të mërkurën në Gjykatën Themelore në Prizren, për tu përballur me akuzën e përvetësimit në detyrë, me vlerë rreth tre mijë euro.

Prokurori i rastit, Sefer Morina, ka lexuar aktakuzën me të cilën e ngarkon të pandehurin për përvetësim të paligjshëm.

I pandehuri, Besnik Huqaj, ka deklaruar se nuk e pranon fajësinë për veprën që i ngarkohet me aktakuzë.

Poashtu i njëjti, pas përfundimit të shqyrtimit fillestar, ka kërkuar që për seancat tjera t’i caktohet një mbrojtës sipas detyrës zyrtare sepse nuk ka mundësi financiare për ta angazhuar personalisht.

Kryetari i trupit gjykues, Skender Çoçaj, ka shqyrtuar kërkesën e të pandehurit dhe ka vendosur që të njëjtit për seancën e radhës, t’ia caktojë një mbrojtës, sipas detyrës zyrtare.

Çoçaj më pas e ka udhëzuar të pandehurin për të drejtat e tij në kundërshtimin e provave dhe aktakuzës në tërësi dhe shqyrtimin e dytë e ka caktuar për 24 tetor 2016, në ora 10:00.

Kjo seancë ishte paraparë të mbahej javën e kaluar, por kishte munguar pikërisht i akuzuari, për të cilin edhe ishte lëshuar urdhër-arrest për këtë seancë.

Sipas aktakuzës, i pandehuri, akuzohet se duke punuar si arkëtar në ujësjellësin “Hidroregjioni Jugor”, dega në Dragash, ka përvetësuar nga arka, në mënyrë të paligjshme, shumën e parave prej rreth 3 mijë eurove.

Me këto veprime, i njëjti, ka kryer veprën penale të përvetësimit në detyrë, andaj nëse shpallet fajtor, rrezikon dënim me burgim deri në pesë vjet.

 

 

 

 

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë