I akuzuari në vuajtje të dënimit në Burgun e Dubravës për vepër tjetër penale, dështon gjykimi për mashtrim

Raporton: Donjeta AJVAZI

Prishtinë – Ka dështuar të mbahet shqyrtimi gjyqësor ndaj të akuzuari A.F se mashtroi postierin privat të “ Korrier Express” duke mos paguar shumë prej 149 euro e 52 centë pas pranimit të dërgesës së pakos nga i njëjti.

Shkak për shtyrjen e shqyrtimit të sotëm ishte mungesa e të akuzuarit F.

Lidhur me mungesën e tij, gjykatësi i rastit Eroll Gashi konstatoi se për të njëjtin, bashkëshortja e tij ka njoftuar gjykatën se burri i  saj është në vuajtje të dënimit në Burgun Dubravë që katër muaj.

I pranishëm në seancën e sotme ishte prokurori Menduhi Kastrati si dhe pala e dëmtuar N.S.

Pasi që nuk u plotësuan kushtet për mbajtjen e këtij shqyrtimi, i njëjti u shty për datën 5 korrik të këtij viti.

Gjykatësi i rastit konstatoi se për palët prezente procesverbali do shërbejë si ftesë e rregullt, ndërsa për të akuzuarin gjykata  do i lëshojë urdhëresë njësisë së transportit që i njëjti të sillet në seancën e radhës nga Burgu i Dubravës.

Sipas aktakuzës së ngritur nga Prokuroria Themelore në Prishtinë në shtator të vitit 2017, i pandehuri A.F me datë 24 nëntor 2016 në Prishtinë, më saktësisht në rrugën “B” me qëllim që vetes apo personit tjetër t’i sjellë dobi pasurore të kundërligjshme e ka sjellë në lajthim të dëmtuarin N.K, postierin privat të “ Korrier Express”  duke mos paguar shumën prej 149 euro e 52 centë pas pranimit të dërgesës së pakos nga i njëjti.

Ashtu që të njëjtit i ka shkaktuar dëm të konsiderueshëm material.

Me këtë po akuzohet se ka kryer veprën penale ”Mashtrimi” nga neni 335 par.1 të KPRK-së, vepër kjo e dënueshme me gjobë dhe me burgim prej tre muaj deri në tre vjet.  /BetimipërDrejtësi.

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë

Ky website përdor cookies për të përmirësuar përvojën tuaj. Ne do të supozojmë se jeni mirë me këtë, por ju mund të hiqni dorë nëse dëshironi. Prano Lexo më shumë